Қозоғистоннинг Олмаота шаҳрида генерал Сағадат Нурмағамбетов хотирасига бағишланган бокс бўйича Халқаро турнирда Ўзбекистон Мудофаа вазирлиги спорт клуби аъзолари умумжамоа ҳисобида иккинчи ўринни қўлга киритди. Бу ҳақда вазирлик матбуот хизмати «Дарё»га хабар берди.
Халқаро турнирда иштирок этган 6 мамлакат (Қозоғистон, Россия, Тожикистон, Мўғулистон, Қирғизистон ва Ўзбекистон)нинг 130 нафар ҳарбий спортчилари ўзаро куч синашди. Анъанавий хотира турнирида Ўзбекистон шарафини 10 нафар спортчи ҳимоя қилди.
Мусобақада ўзбекистонлик спортчилардан Абдулло Қўчқоров (56 кг) ҳамда Мадиёр Сайидраҳимовлар (+91 кг) олтин медални қўлга киритди. Ҳасанбой Латипохунов (52 кг), Шукур Раҳимов (60 кг) ва Бобоусмон Ботиров (69 кг) турнирнинг кумуш медаллари билан тақдирланди. Бронза медалларига эса Жаҳонгир Расулов (64 кг), Одилжон Аслонов (75 кг) ва Козимбек Мардоновлар (81 кг) томонидан эга чиқилди.
Умумжамоа ҳисоби бўйича турнир мезбонлари биринчи, Ўзбекистон иккинчи ва Россия эса учинчи ўринни эгаллади.
Изоҳ (0)