Ўзбекистон давлат геология ва минерал ресурслар қўмитаси ва Туркия Энергия ва табиий ресурслар вазирлиги минерал ресурсларни ўрганиш ва тадқиқ қилиш Бош бошқармаси «Хуроб» ва «Айдим-Жетимтоу» олтин майдонлари, шунингдек, Саритоу конининг геологик жиҳатдан ўрганишни келишиб олди, деб хабар беради «Газета.uz».
Маълумотларга кўра, бу борадаги битим 30 апрель, душанба куни Ўзбекистон ва Туркия президентларининг музокаралари доирасида имзоланган.
Таъкидланишича, геологик тадқиқот ишлари жорий йилданоқ бошланади. «Хуроб» (Жиззах вилояти) ва Айдим-Жетимтау (Навоий вилояти) олтин конларининг захиралари ҳали ўрганилмаган. Саритоу конидаги вольфрам захираси миқдори 740 минг тоннага, молибден — 24 минг тоннага, олтин эса 75,2 тоннага баҳоланган.
Учта объектни тадқиқ этиш учун уч йил давомида 5 миллион доллар сарфланади. Инвестициялар Туркия томонидан геология қидирув ишларининг натижалари асосида амалга оширилади.
Изоҳ (0)