АҚШ элчихонаси Ўзбекистонда фуқаролик жамияти фаоли Ғайбулло Жалилов озод этилганини олқишлади

Қўшма Штатлар Ўзбекистонда фуқаролик жамияти фаоли Ғайбулло Жалилов озод этилганини олқишлайди. Бу ҳақда АҚШнинг Ўзбекистондаги элчихонаси баёнот берди.

«2009 йили хавфсизликка алоқадор масала ва рўйхатдан ўтмаган диний ташкилотга аъзоликда айбланиб, озодликдан маҳрум этилган Жалилов доим айбсиз эканини айтиб келган. 2013 йили БМТнинг ҳибсга олиш ва ушлаб туриш бўйича ишчи гуруҳи Жалиловни озод этишга чақирганди», — дейилади ҳужжатда.

Баёнотда Қўшма Штатлар ушбу қарор ҳамда Ўзбекистонда суд тизимида ошкораликни кучайтириш, барча фуқаролар учун қонунга мувофиқ адолатли муносабатларни такомиллаштириш бўйича ислоҳотларни қўллаб-қувватлаши билдирилган.