Ўзбекистондан Россия ва Қозоғистонга темирйўл қатновлари кўпайтирилади. Миллий лоукостер бўйича таклиф 1 майгача ҳукуматга тақдим этилади

Ўзбекистон Президенти Шавкат Мирзиёев «Ўзбекистон Республикаси фуқароларининг вақтинчалик меҳнат фаолиятини амалга ошириш учун республика ташқарисига транспортда чиқиш вақтида хавфсизлигини таъминлаш чора-тадбирлари тўғрисида»ги қарорни имзолади.

Қарор шарҳи Ўзбекистон Бандлик ва меҳнат муносабатлари вазирлиги томонидан эълон қилинди.

Қарорда темирйўл ва авиатранспорти имкониятини ошириш бўйича амалий чора-тадбирлар кўзда тутилган, жумладан:

• 2018 йил 1 майгача — вақтинчалик меҳнат фаолиятини амалга ошириш учун фуқаролар кўп борадиган Россия ва Қозоғистон ҳудудлари ва шаҳарларига янги темирйўл йўналишлари жорий этиш;
• 2018 йил 1 июнгача — вақтинчалик меҳнат фаолиятини амалга ошириш учун Ўзбекистон ташқарисига чиқаётган фуқаролар томонидан талаб юқори бўлган йўналишларда янги йўловчи поездларни қўйиш ҳамда пласкарт ва умумий вагонлар сонини кўпайтириш, жумладан ушбу йўналишлардаги темирйўл поезди жўнашини ҳудудий темир йўл станцияларидан амалга ошириш;
• 2018 йил 1 июлгача — вақтинчалик меҳнат фаолиятини амалга ошириш учун Ўзбекистон ташқарисига чиқаётган фуқароларни ташиш учун зарур бўлганда хорижий темир йўл компанияларнинг республика ҳудудига киришини, Ўзбекистон ҳудудий темирйўл боғланмаларидан Россия ва Қозоғистон станцияларигача йўловчи ташишини назарда тутган ҳолда, таъминлаш;
• 2018 йил 1 майгача — Вазирлар Маҳкамасига «Ўзбекистон ҳаво йўллари» ҳузурида вақтинчалик меҳнат фаолиятини амалга ошириш учун республика ташқарисига чиқаётган фуқароларни пасайтирилган тарифларда ташувчи камбюджетли авиакомпания (лоукостер) ташкил этиш тўғрисида таклифларни киритиш назарда тутилган.

Аввалроқ, 28 февраль куни «Ўзбекистон ҳаво йўллари» ҳузурида миллий лоукостер ташкил этилиши, янги камбюджетли авиакомпанияни ташкил этиш масаласи 2018 йил охиригача ёпилишини айтилган эди. Жумладан, унда Тошкентдан Москвага тахминан 100 доллар эвазига етиб олиш мумкин бўлиши таъкидланганди.