Ўзбекистонда илк марта ўтказилаётган халқаро матбаа форумининг веб-сайти ишга тушди

14—15 март кунлари Ўзбекистон матбуот ва ахборот агентлиги ҳамда «А2 Digital» МЧЖ ҳамкорлигида «Инновацион технологияларнинг янги қирралари» шиори остида Ўзбекистонда илк бор биринчи халқаро матбаа форуми бўлиб ўтади. 6 март куни ушбу форумнинг расмий веб-сайти ишга тушди. Бу ҳақда Ўзбекистон матбуот ва ахборот агентлиги хабар бермоқда.

Форумда Америка Қўшма Штатлари, Россия, Германия, Исроил, шунингдек, Марказий Осиё давлатларидан йирик матбаа корхоналарининг вакиллари иштирок этади.

Форум доирасида Ўзбекистонда матбаачилик соҳасига татбиқ этилган инновацион технологиялар ва эришилган натижалар, соҳанинг истиболдаги ривожланиш тенденциялари хусусида назарий ва амалий мулоқотлар, тақдимотлар ва учрашувлар ташкил этилади.