Шавкат Мирзиёев ўтган йилнинг 15—16 декабрь кунлари Қорақалпоғистон Республикасига ташрифи доирасида Германияда 11 йил давомида ўқиб, ишлаган фан доктори Алишер Қурбоновга Captiva автомобилини совға қилгани ҳақида хабар берилганди. «KRuz.uz» нашри Қораўзак туманидаги Panaev farms фермасига ташриф буюриб, Алишер Қурбонов билан суҳбатлашди.
Германияда 11 йил давомида ҳам ўқиб, ҳам ишладим. Диссертациямни немис тилида ёқладим. Ўтган йили уйга дам олишга келганимда, Қутлимурат ака (Панаев) мени шу ерда қолиб, ишлашимни сўрадилар. Бунинг учун менга барча зарур шароитларни яратиб бердилар. Ферма ичида уй қуриб бердилар. Бироқ мен битта жойда узоқ вақт қолиб кетсам, анча қийналаман. Доимий ҳаракатда бўлишга ўрганиб қолган эдим. Шу боис 19 декабрь куни яна Германияга кетишга қарор қилдим ва 6 ой ишлаб, кейин яна фермага қайтмоқчи эдим. 15 декабрь куни Президентимиз Шавкат Мирзиёев билан учрашув ҳаётимни бутунлай ўзгартириб юборди. Менга Captiva автомобилини совға қилишлари ҳатто тушимга ҳам кирмаганди. Президент билан учрашувдан сўнг, мен Қорақалпоғистонда қолишим керак эканини тушундим. Йўқ, бунга Captiva сабаб эмас. Президент ишонч билдирдими, демак уни оқлашим керак. Халқимга нафим тегиши керак. Шундан сўнг ҳар куни камида 2—3 та фермер фермамизга ташриф буюриб, ишлаш жараёнимиз билан танишмоқда.Алишер Қурбонов, Panaev farms менежери
Алишер Қурбонов Captiva совғасини олганидан сўнг билдирилган салбий фикрлар ҳақида ҳам тўхталиб ўтди.
Президент Captiva берганидан сўнг, ижтимоий тармоқларда турли инсонлар ўзи Германияда ишлаган бўлса, унга Captiva беришнинг нима кераги бор ёки шунга ўхшаш танқидий фикрларни билдиришган. Ҳатто айрим инсонлар телефон қилиб ‘жиннимисан, Германияда ишлаб юравермайсанми, нима қиласан қайтиб’, деб айтишди. Бироқ ҳар бир инсон ўз юртида ишлашни хоҳлайди.Биласизми, Германияда ишлаётган ҳамюртларимиз кўплаб топилади. Улар ҳам юртимизга қайтиб, шу ерда ишлашни хоҳлашади албатта. Бироқ улар ҳам уй олиш учун пул тўплашади, кунни кун демай, тунни тун демай ишлашади. Агар уларга ҳам юртимизда яхши имконият яратиб берилса, қайтишга тайёрлар.
Ижтимоий тармоқларда уни шифокор ёки ветеринар дея билишлари ҳақида ўз фикрларини баён этди.
«Мен фан докториман. Мол дўхтири ёки шифокор эмас. Германияда қишлоқ хўжалиги мутахассислиги бўйича магистрлик, иқтисодиёт бўйича докторлик илмий ишларимни немис тилида ёқладим ва келажакда ҳали илмий ишларимни давом эттириш ниятим бор», — дейди Алишер Қурбонов.
Изоҳ (0)