Shavkat Mirziyoyev o‘tgan yilning 15—16-dekabr kunlari Qoraqalpog‘iston Respublikasiga tashrifi doirasida Germaniyada 11 yil davomida o‘qib, ishlagan fan doktori Alisher Qurbonovga Captiva avtomobilini sovg‘a qilgani haqida xabar berilgandi. “KRuz.uz” nashri Qorao‘zak tumanidagi Panaev farms fermasiga tashrif buyurib, Alisher Qurbonov bilan suhbatlashdi.
Germaniyada 11 yil davomida ham o‘qib, ham ishladim. Dissertatsiyamni nemis tilida yoqladim. O‘tgan yili uyga dam olishga kelganimda, Qutlimurat aka (Panayev) meni shu yerda qolib, ishlashimni so‘radilar. Buning uchun menga barcha zarur sharoitlarni yaratib berdilar. Ferma ichida uy qurib berdilar. Biroq men bitta joyda uzoq vaqt qolib ketsam, ancha qiynalaman. Doimiy harakatda bo‘lishga o‘rganib qolgan edim. Shu bois 19-dekabr kuni yana Germaniyaga ketishga qaror qildim va 6 oy ishlab, keyin yana fermaga qaytmoqchi edim. 15-dekabr kuni Prezidentimiz Shavkat Mirziyoyev bilan uchrashuv hayotimni butunlay o‘zgartirib yubordi. Menga Captiva avtomobilini sovg‘a qilishlari hatto tushimga ham kirmagandi. Prezident bilan uchrashuvdan so‘ng, men Qoraqalpog‘istonda qolishim kerak ekanini tushundim. Yo‘q, bunga Captiva sabab emas. Prezident ishonch bildirdimi, demak uni oqlashim kerak. Xalqimga nafim tegishi kerak. Shundan so‘ng har kuni kamida 2—3 ta fermer fermamizga tashrif buyurib, ishlash jarayonimiz bilan tanishmoqda.Alisher Qurbonov, Panaev farms menejeri
Alisher Qurbonov Captiva sovg‘asini olganidan so‘ng bildirilgan salbiy fikrlar haqida ham to‘xtalib o‘tdi.
Prezident Captiva berganidan so‘ng, ijtimoiy tarmoqlarda turli insonlar o‘zi Germaniyada ishlagan bo‘lsa, unga Captiva berishning nima keragi bor yoki shunga o‘xshash tanqidiy fikrlarni bildirishgan. Hatto ayrim insonlar telefon qilib ‘jinnimisan, Germaniyada ishlab yuravermaysanmi, nima qilasan qaytib’, deb aytishdi. Biroq har bir inson o‘z yurtida ishlashni xohlaydi.Bilasizmi, Germaniyada ishlayotgan hamyurtlarimiz ko‘plab topiladi. Ular ham yurtimizga qaytib, shu yerda ishlashni xohlashadi albatta. Biroq ular ham uy olish uchun pul to‘plashadi, kunni kun demay, tunni tun demay ishlashadi. Agar ularga ham yurtimizda yaxshi imkoniyat yaratib berilsa, qaytishga tayyorlar.
Ijtimoiy tarmoqlarda uni shifokor yoki veterinar deya bilishlari haqida o‘z fikrlarini bayon etdi.
“Men fan doktoriman. Mol do‘xtiri yoki shifokor emas. Germaniyada qishloq xo‘jaligi mutaxassisligi bo‘yicha magistrlik, iqtisodiyot bo‘yicha doktorlik ilmiy ishlarimni nemis tilida yoqladim va kelajakda hali ilmiy ishlarimni davom ettirish niyatim bor”, — deydi Alisher Qurbonov.
Izoh (0)