2017 йилда «Авторақам» онлайн аукциони орқали 27,6 млрд сўмлик 1364 та «чиройли» авторақам сотилди

Ўзбекистон Республика товар-хом ашё биржаси ахборот портали «ЎзРTХБ» АЖ фаолиятининг 2017 йил якунлари ҳақида маълумот берди.

Қайд этилишича, Ўзбекистон Республикаси Вазирлар Маҳкамасининг 2017 йил 31 августидаги 683-сонли қарорини бажариш мақсадида жисмоний ва юридик шахсларга автомототранспорт воситалари учун рўйхатдан ўтказиш давлат рақами белгиларини оширилган тўлов ставкаларида сотиш бўйича янги савдо платформаси ишга туширилди. Авторақамларни сотиш бўйича онлайн аукцион биржанинг янги avtoraqam.uzex.uz вебсайтида амалга оширила бошлади.

«Авторақам» тизими ишга тушган пайтдан бошлаб 2017 йилнинг охирига қадар «ЎзРTХБ» АЖ нинг онлайн аукциони орқали умумий қиймати 27,6 млрд сўмлик 1364 та «чиройли» авторақамлар жисмоний ва юридик шахсларга сотилди.