Футбол тарихидаги энг қиммат 4 трансфер: Франция ва бразилиялик футболчилар даври

Каталониянинг «Барселона» клуби сафига бориб қўшилган бразилиялик Филиппе Коутиньо футбол тарихидаги энг қиммат иккинчи футболчига айланиб олди.

Қизиқ тарафи, трансфер ойнасининг энг қиммат харидлари учлигида «Барселона» номини учратиш мумкин. Неймарни «ПСЖ»га 222 миллион еврога сотган каталонияликлар, кейинроқ Усмон Дембелега Поль Погбанинг нархини тўлади, кўп ўтмай, «Ливерпуль»дан Коутиньони қўшимча 40 миллионлик бонуси бор бўлган 120 миллион еврога сотиб олди.

Суратда энг қиммат футболчилар нархи Британия фунтида кўрсатиб ўтилган. Айни вақтда 1 фунт старлинг 1,12 еврога тенг. Мана шу тўрт футболчидан икки энг қиммати бразилиялик, қолган икки киши эса франциялик.

Ўз вақтида Гарет Бэйл «Реал» учун 100,8 миллион еврога тушганди. «Қироллик клуби» Криштиану Роналдуни 94 миллионга харид қилганди. Ўнталикдан, шунингдек, 90 миллионлик Гонсало Игуаин, ўз вақтида «Барселона» учун 86,2 миллионга тушган Неймар, 84,8 миллионлик Ромелу Лукаку ҳамда 84,5 миллионлик Виржил ван Дейк жой олган.

Воқеалар ривожи шу тақлид давом этиб, Неймар «Реал» либосини киядиган бўлса, кучли 10 таликда бир футболчи номи уч бор қайд этилиши ҳам катта эҳтимол.