Қаршида 4 та гол ўтказган «Пахтакор» клуби «Насаф»нинг яна бир футболчисини ўз сафига қўшиб олди

Тошкентнинг «Пахтакор» клуби ҳимоячи Фаррух Сайфиев билан 2 йиллик келишувга эришди. Бу ҳақда клуб матбуот хизмати хабар берди.

Фаррух Сайфиев Қаршининг «Насаф» клуби сафида бунгача 111 учрашувда иштирок этган бўлиб, рақиблар дарвозасига 13 та гол уришнинг уддасидан чиқа олганди. Чап қанот ҳимоясидаги ўйинлари сабаб ўз вақтида Миржалол Қосимов уни миллий терманинг расмий ўйинларида ҳам майдонга туширган. Самвел Бабаян эса Сайфиевни Эронга олиб кетган бўлса-да, форсларга қарши беллашувда аввал Станислав Андреев, кейин Даврон Ҳошимов хизматидан фойдаланишни афзал билганди.

1991 йилда туғилган футболчи «Пахтакор»га эркин агент мақомида келганми ёки «Насаф» ҳисоб рақамига пул ўтказилганми — аниқ маълумот йўқ. Якунига етган мавсумнинг экваторида «Пахтакор» Қарши клубидан ҳимоячи Шерзод Аъзамов ҳамда дарвозабон Элдор Суюновни 1 миллиард сўмга харид қилганди.

Шунга қарамай, «Пахтакор» мавсумнинг ҳал қилувчи ўйинини Қаршида ўтказиб, «Насаф»дан йирик — 0:4 ҳисобида енгилди ва Чемпионлар Лигасига йўлланмани қўлдан бой берди. Фақатгина «Локомотив»нинг кубок финалидаги ғалабаси сабаб Шота Арвеладзе жамоаси халқаро майдонда тўп сурадиган бўлди.

Фаррух Сайфиев билан шартнома имзолангунига қадар «Пахтакор» ҳужумчи Игорь Сергеев ҳамда ярим ҳимоячи Шерзод Каримов билан хайрлашганди.

«Пахтакор»ни Шерзод Каримовдан кейин Игорь Сергеев ҳам тарк этди. Чемпионлар Лигасига эса 33 кун вақт қолди