Наманган шаҳридаги «Уч фаввора» мажмуасида профилактика инспекторларининг тантанали қасамёд қабул қилиш маросими ўтказилди. Бу ҳақда «Дарё»га вилоят ИИБ матбуот хизмати маълум қилди.
Маросимда Наманган вилоятидаги шаҳар ва туманларда фаолият олиб борувчи 160 нафар профилактика инспекторига хизмат уйлари ва автомобиллар топширилди. Ўз бурчига садоқат, ватан ва халқ манфаатлари йўлида хизмат қилишга қасамёд қилган ходимлар хизмат уйлари ҳамда Matiz машиналари калитини қабул қилиб олди.
Профилактика инспекторлари номидан сўз олганлар ички ишлар органлари қуйи тизимларида фаолият олиб бораётган ходимлар учун яратиб берилаётган шароитлар янада самарали фаолият юритишга ундашини айтиб ўтди. Маросим якунида инспекторлар ва уларнинг оила аъзолари янги машиналарда хизмат уйларига йўл олди.
Тантанали маросимда Ўзбекистон Президентининг Давлат маслаҳатчиси Отабек Муродов, Олий Мажлис Сенати раисининг ўринбосари Светлана Артикова, Ички ишлар вазири, генерал-майор Пўлат Бобожонов ва вилоят ҳокими Хайрулла Бозоров иштирок этди.
Изоҳ (0)