Дастлабки маълумотларга қараганда, Олмаота яқинида қулаган Ан-28 самолёти бортидаги беш кишидан икки нафари Қирғизистон фуқароси бўлган. Бу ҳақда «РИА Новости» хабар бермоқда.
Қирғизистоннинг Олмаотадаги бош консуллиги шу муносабат билан тезкор чоралар кўришга киришиб кетди. Улар Қозоғистон инвестициялар ва ривожланиш вазирлигининг транспорт терговлари департаменти билан боғланиб, марҳумларнинг таналарини юртига қайтариш борасида музокаралар олиб бормоқда.
Фожиа 3 октябрь куни рўй берди. Қозоғистон ИИВ фавқулодда вазиятлар қўмитаси вакили Руслан Иманқуловга кўра, Олмаотанинг Или туманида маҳаллий вақт билан 19:15 да санитар авиация йўналиши бўйича парвоз амалга оширган Ан-28 радарлардан йўқолди. Бир соатдан сўнг у қулагани ва қулаш чоғида олов олгани маълум бўлди. Бортда беш киши бор эди, уларнинг барчаси ҳалок бўлди.
Изоҳ (0)