Ироқ Курдистони Ироқ ва автономия ўртасидаги баҳсли ҳудудлар мақоми бўйича музокараларга тайёр. Бу ҳақда Ироқ Курдистони парламенти раисининг ўринбосари Жаъфар Иброҳим маълум қилди, дея хабар беради «РИА Новости».
«Конституцияда қайд этилган биринчи вариант: референдум ташкил этиш ва овозларни ҳисоблаб чиқиш. Бағдод буни рад этди. Иккинчи вариант — референдумда иштирок этган минтақалар — Курдистон минтақалари. Агар эътирозлар бўлса, Курдистон ва Ироқ ўртасидаги чегараларга аниқлик киритиш учун халқаро назорат остида ва БМТ ёрдамида жиддий мулоқотга киришамиз», — деди Иброҳим.
Баҳсли ҳудудлардан бири нефтга бой Киркук вилояти бўлиб, унинг кенгаши август охирида ҳудудни Ироқ Курдистони мустақиллиги бўйича овоз беришга киритилишини маъқуллаганди. Натижада тегишлилиги қизғин баҳсларга сабаб бўлган Киркук шаҳри аҳолиси референдумда иштирок этди.
Киркук губернатори Нажмиддин Карим олдинроқ вилоят на Ироқ ҳукумати, на парламентига бўйсунишини билдирганди. Ўз навбатида, Ироқ бош вазири Ҳайдар ал-Ободий 4 октябрь, чоршанба куни мамлакат парламентидан Киркукка қўшин киритиш ҳуқуқини олди.
Изоҳ (0)