Тошкент шаҳар руҳий касалликлар клиник шифохонаси реставрация қилинмоқда

Тошкент шаҳар руҳий касалликлар клиник шифохонасида қурилиш ва таъмирлаш ишлари олиб борилмоқда. Бу ҳақда «Письма о Ташкенте» нашри хабар бермоқда.

«Президент ташрифидан сўнг бу ерда иш қайнамоқда. Янги корпус қурилмоқда, бошқаси учун котлован қазилмоқда, эски корпуслар эса бўшатилган — уларни реставрация қилишади. Биттасида аллақачон тарақ-туруқ ишлари бормоқда», — дейилади хабарда.

Эслатиб ўтамиз, Шавкат Мирзиёев 26 июнь, Рамазон ҳайити куни Тошкент шаҳар руҳий касалликлар клиник шифохонасини бориб кўрган, шифохонанинг эски биноларини янгилаш борасидаги лойиҳалар билан танишиб, беморларга яратилган шароитларни кўздан кечирган эди.

ЎзА маълумотларига кўра, Тошкент шаҳар руҳий касалликлар клиник шифохонаси 1896 йилда қурилган. Шифохонада касалликлар тури, даволаш усуллари, беморлар ҳолатига ихтисослашган 18 бўлим ташкил этилган. Клиник-биокимё лабораторияси, рентген, УТТ, энцефалография, экспертиза хоналари зарур восита ва малакали мутахассислар билан таъминланган. Шифохона Тошкент тиббиёт академияси, Тошкент педиатрия тиббиёт институти, Тошкент врачлар малакасини ошириш институтининг руҳий касалликлар кафедралари учун клиник база ҳисобланади.

Ўзбекистон Республикаси Вазирлар Маҳкамасининг 2013 йил 25 июлдаги руҳий-тиббий хизмат фаолиятини такомиллаштиришга оид қарорига мувофиқ, шифохонада қурилиш-реконструкция ишлари амалга оширилмоқда. 2015-2016 йилларда 4 янги бино фойдаланишга топширилди. Икки қаватли яна бир корпус қурилмоқда.