Марказий банк: 50 минг сўмликнинг муомалага чиқарилиши инфляция ва нархларга таъсир кўрсатмайди

Ўзбекистон Марказий банки 50 минг сўмлик янги банкнотларнинг муомалага чиқарилиши юзасидан расмий шарҳ берди. Шарҳ матни банк сайтида эълон қилинган.

Хабар беришларича, 22 августдан муомалага чиқариладиган 50 минг сўмлик банкнот намунаси ва дизайни Олий Мажлис Сенати томонидан 14 август куни тасдиқланган.

Марказий банкнинг малълум қилишича, 50 минг сўм қийматдаги банкнотни муомалага киритиш Ўзбекистонда «сўнгги йилларда ўртача иш ҳақи миқдорининг ошиб бориши ҳамда аҳолига иш ҳақи, пенсия ва нафақаларни тўлашда, шунингдек нақд пулдаги ҳисоб-китобларни амалга оширишда қулайликлар яратиш мақсадида» амалга оширилмоқда.

Шуни алоҳида қайд этиш лозимки, муомалага йирик банкнотларнинг чиқарилиши иқтисодиётдаги пул массасининг ўзгаришига олиб келмайди ҳамда инфляция даражаси ва нархлар барқарорлигига таъсир кўрсатмайди.

Ўзбекистон Марказий банки ахборотидан

Шунингдек, Марказий банкнинг қўшимча қилишича, мазкур амалиёт нақд пулдаги ҳисоб-китобларни ихчамлаштириш, нақд пулни ташиш, етказиш ва сақлаш билан боғлиқ харажатлар ва ноқулайликларни камайтириш ҳамда банкоматлар орқали аҳолига кўрсатиладиган хизматлар кўламини кенгайтириш имконини ҳам беради.