Тошкент шаҳар ИИББ Дўмбиробод қабристонидаги ёдгорлик тошлари шамол оқибатида зарар кўрганини билдирди
Бир муддат илгари Тошкент шаҳридаги Дўмбиробод қабристонининг бир қатор участкаларида дарахт кесиш ишлари вақтида қабртошлар, ёдгорликлар бузилгани ҳақидаги хабар ижтимоий тармоқларда қизғин баҳсларга сабаб бўлган эди. Тошкент шаҳар ИИББ воқеани ўрганиб чиқиб, бу борада баёнот билан чиқди.
«23 июль куни Чилонзор туманида жойлашган Дўмбиробод қабристонидаги қабрлар устига ўрнатилган ёдгорлик тошлари номаълум шахслар томонидан бузилгани ҳақида мақола берилган. Ушбу ҳолат юзасидан олиб борилган суриштирув ишлари давомида мазкур қабристоннинг 137-сонли картаси ўрганиб чиқилиб, аслида қабрларнинг устига синган дарахт шохлари тушиб, қабр тошларига зарар етганлиги маълум бўлди», — дейилади хабарда.
Хабарномада айтилишича, ҳолат бўйича Чилонзор туманида жойлашган 2-сонли Дўмбиробод қабристони директори Х.А. Нишонов, қабристон ишчилари О.С. Нуриддинов ҳамда Р.Д. Шерматовларнинг тушунтиришларига кўра, жорий йилнинг баҳор ойларида юз берган кучли шамоллар натижасида дарахтлар синиб, қабр тошлари устига тушиб, уларни синдирган. Қабристон майдони катта бўлгани сабабли улар барча карталарни тозалашга ҳамда таъмирлашга улгурмаган.
Шунингдек, ҳозирги кунда дарахтларни буташ ва чиқиндиларни тозалаш ишлари олиб борилаётгани ва ободонлаштириш ишлари якунига етганидан сўнг синган ёдгорлик тошларини тиклаш режалаштирилгани маълум қилинди.
