2016 йилнинг 15 июнь куни Аҳмаджон Турсунбоев — тўрт-беш йил давомида бир неча ўн минг одамни қамраб олган «молиявий пирамида» асосчиси — чинозлик Аҳмадбой қўлга олинган эди. У икки баробар қилиб қайтариш ваъдаси билан автомобиллар, қорамол, жуда катта миқдордаги омонат маблағларни миллий ва хорижий валютада қабул қилиш билан ноқонуний равишда шуғулланиб келган.
Шов-шувга сабаб бўлган мазкур воқеа юзасидан телевидение орқали намойиш этилган махсус кўрсатувларда дастлабки суриштирув ишлари давомида Аҳмадбой ва унинг яқинлари хонадонларидан нақд 13,1 миллиард сўм ва 12 миллион доллар топилгани айтилган. Унинг қўлида ғазначи бўлиб ишлаган шахслардан бири «кунлик пул айланмаси 3—4 миллиард сўмни, АҚШ долларида 1 миллион атрофидаги суммани ташкил этгани»ни маълум қилган эди.
Аҳмадбой бир ўзи ишламаган — унинг бир қатор ёрдамчилари, шунингдек, ундан илҳом олган издошлари ҳам бўлган. Аҳмадбойнинг қўлга олинишига бағишланган махсус кўрсатувда «унинг йўли»дан борган Нуриддин Абулғозиев, Қувончбек Абдулқосимов қўлга олинган, «чинозлик Муродбой» номи билан танилган Мирзамурод Юнусалиев эса қочиб кетгани, уни қўлга олиш бўйича чора-тадбирлар кўрилаётгани билдирилган эди.
Орадан бир йил ўтди. Аҳмадбой қўлга олинганидан уч ой ўтиб, Президент «молиявий пирамида» ташкил қилганлик учун жавобгарликни кучайтирувчи қонунни имзолади. Лекин бошқа масалалар очиқ қолмоқда ёки ҳали ҳам жамоатчиликка билдирилгани йўқ: Нуриддин Абулғозиев ва Қувончбек Абдулқосимовга нисбатан қандай чора кўрилди? Муродбой қўлга олиндими? Аҳмадбой қаерда? Энг асосийси — Аҳмадбой ва у каби фаолият билан шуғулланган бошқа шахслардан зарар кўрганларга қандай кўмак кўрсатилди, кўрсатилмоқда?
Май ойи охирида Тошкент вилояти Ички ишлар бошқармасида бўлиб ўтган брифинг чоғида журналистлар томонидан Аҳмадбой масаласида савол берилди. Унга: «Аҳмадбой иши бўйича тергов ҳаракатлари ички ишлар тизимида эмас. Тегишли мутасадди органлар тергов ҳаракатларини олиб бормоқда», — дея қисқа жавоб берилди. Эътиборли томони, шу савол берилган вақтда Чинозда бошқа бир янги «пирамида»чи — Баҳо Марли номи билан танилган шахс қўлга олинган, ҳуқуқни муҳофаза қилиш органлари бу ҳолат юзасидан «тергов ҳаракатлари давом этаётгани»ни маълум қилган эди.
«Тегишли мутасадди органлар» жамоатчилик учун муҳим аҳамиятга эга бўлган воқеа-ҳодисалар юзасидан нафақат «тергов ҳаракатлари олиб борилаётгани» ҳақида, балки бу терговларнинг оралиқ якунлари, натижалари ҳақида қачон расмий ахборот бериши ҳақида аниқ маълумотлар йўқ.
Изоҳ (0)