Toshkent viloyatining Chinoz tumanida huquq-tartibot organlari tomonidan 2016-yil 15-iyun kuni o‘tkazilgan tezkor tadbir vaqtida xalq orasida Ahmadboy nomi bilan tanilgan, moliyaviy piramida tashkil etishga muvaffaq bo‘lgan Ahmad Tursunboyev qo‘lga olindi.

30-iyun kuni O‘zMTRK telekanallari orqali efirga uzatilgan “Ahmad vasvasasi” ko‘rsatuvida tergov-surishtiruv davomida Chinoz tumanida Ahmad Tursunboyevdan tashqari yana bir necha fuqaro ikki barobar qilib qaytarish va’dasi bilan aholidan avtomashina, pul, qoramol va boshqa moddiy boyliklarni kafolatsiz, og‘zaki ravishda kelishib qabul qilib kelgani aniqlangani ma’lum qilindi.

“Daryo” “Ahmad vasvasasi” ko‘rsatuvida chinozlik Ahmadboyning “shogirdlari”, “hamtovoqlari” deya ta’riflangan shaxslar haqida e’lon qilingan ma’lumotlarni so‘zma-so‘z keltiradi.

Quvonchbek Abdulqosimov

Kadr: “Toshkent” telekanali

Kadr: “Toshkent” telekanali

Ahmad Tursunboyev qurayotgan piramidaning tezkorlik bilan o‘sib borishining sabablaridan biri uning joylarda filiallar ochishi bilan bog‘liq. Ana shundaylardan biri — uning ishonchini oqlab, mehru muhabbatiga sazovor bo‘lgan Quvonchbek Abdulqosimovdir.

Quvonchbek Abdulqosimov Chinoz tumanidagi Sutbuloq mahallasida aholidan naqd pul, avtomashina, chorva mollari va qimmatbaho buyumlarni qabul qilib, Ahmad Tursunboyevga yetkazib berish bilan shug‘ullanadi. Ammo bu munosabatlar xayrli yakun topmaydi.

Boisi, aholidan katta miqdorda pul qabul qila boshlagan “yangi boy” o‘z xojasiga sadoqatsizlik qiladi. Oxir-oqibat shu darajaga borib yetadiki, Quvonchbek Abdulqosimov o‘zi mustaqil ish yuritib, yiqqan pullarini Ahmad Tursunboyevning kassalariga kirim qilmay qo‘yadi. O‘rtada kuchli ziddiyat paydo bo‘ladi.

Sadoqatli shogirdning itoatsizligidan pand yegan ustoz uni imkon qadar tezroq o‘yindan chiqarish payiga tushadi. Unga avvaldan topshirmay kelayotgan 738 ming AQSh dollarini qaytarib berish shartini qo‘yadi, Quvonchbek Abdulqosimov bu talabni bajarmaganidan so‘ng, uning ustidan huquq-tartibot organlariga shikoyat arizasi kiritadi.

Mana shu yerga kelganida moliyaviy piramidaning asosiga zil ketganini fahmlash qiyin emas. O‘zaro murosasizliklar nish urayotgan paytda Quvonchbek Abdulqosimovning va’dasiga ishongan odamlar Ahmad Tursunboyevdan pullarini so‘rab, da’vo qilishadi.

Nuriddin Abulg‘oziyev

Kadr: “Toshkent” telekanali

Kadr: “Toshkent” telekanali

Nuriddin Abulg‘oziyev noqonuniy yo‘l bilan orttirgan boyliklari hisobiga Yangiyo‘l shahrida joylashgan ko‘p qavatli 140-uyning birinchi qavatini to‘liq sotib oladi va u yerda fitnes-klub qurish ishlarini boshlab yuboradi.

Tergov-surishtiruv jarayonida Toshkent shahrida joylashgan “Diyorbek” mehmonxonasi va Zangiota tumanidagi “Yuksalish” to‘yxonasi Nuriddin Abulg‘oziyevga tegishli ekani aniqlandi. Bundan tashqari, aholidan yig‘ib olingan mol-mulk evaziga Qibray tumanida dang‘illama hovli qurish ishlarini boshlab yuborgani ma’lum bo‘ldi.

Unga tegishli bo‘lgan avtomobillar turar-joyidan esa aholidan qabul qilingan 62 ta turli rusumdagi avtomobillar borligi aniqlandi.

Ahmad Tursunboyev huquq-tartibot organlari tomonidan qo‘lga olinganidan keyin tahlikaga tushib qolgan Nuriddinning abonentlari pullarini da’vo qila boshlashadi. Hammaga birvarakayiga pulni qaytarish imkonsizligi ma’lum bo‘lib qolganidan keyin o‘rtada ziddiyat yuzaga keladi va Nuriddin yashash joyidan qochib ketadi.

“Buzoqning yugurgani somonxonagacha” deganlaridek, oradan hech qancha o‘tmasdan Nuriddin Abulg‘oziyev huquq-tartibot organlari tomonidan qo‘lga olinadi.

Mirzamurod Yunusaliyev (Murodboy)

Kadr: “Toshkent” telekanali

Kadr: “Toshkent” telekanali

Hozirda qidiruvda bo‘lgan, 1984-yilda Chinoz tumanida tug‘ilgan Mirzamurod Yunusaliyev ham 2015-yilga qadar Ahmadning yugurdaklaridan bo‘lgan va xalq orasida, xuddi ustozi kabi — Murodboy nomini oladi.

Unga tegishli bo‘lgan avtomobil turar joylarida aholidan ikki hissa qaytarish va’dasi bilan olingan 100 dan ortiq turli rusumdagi avtomobillar borligi aniqlandi.

Mirzamurod Yunusaliyev ikki hamtovog‘ining qismatidan voqif bo‘lganidan keyin o‘z yashash manzilidan qochib ketadi va hozirda uni qo‘lga olish chora-tadbirlari ko‘rilmoqda.