Жулиан Ассанжнинг онаси Австралия бош вазирини ўғлига ёрдам кўрсатишга чақирди
WikiLeaks ташкилотининг асосчиси Жулиан Ассанжнинг онаси Кристин Австралия бош вазири Малколм Тернбуллни «ўғли Эквадорга тўсиқларсиз етиб олишида Буюк Британия ҳукуматига босим ўтказишга» чақирди, деб хабар берди «ТАСС».
Журналистлар билан суҳбатлашган Кристин Ассанж Австралия ҳукумати «ўғлининг саёҳат қилиши учун тезда янги паспорт расмийлаштириб бериши лозим»лигини айтди.
«Мен Малколм Тернбуллни ўзини бош вазирдек тутишга ва мамлакат фуқаросини ҳимоя қилишга чақираман», — деди Кристин.
Ўз навбатида Ассанжнинг ҳуқуқшунослари жамоаси вакили Грег Барнс Sky News телекомпаниясига берган интервьюсида Австралия ҳукумати «Вашингтон ва Лондон билан гаплашиб кўриши лозим» дея таъкидлади.
«Австралия ҳукумати мамлакат фуқароси бўлган Жулиан Ассанжнинг муаммосини ҳал қилишдан аллақачон четга чиққан», — деди адвокат.
18 май, пайшанба куни Швеция прокуратураси зўрлашда гумонланаётган Ассанжга нисбатан терговни тўхтатган эди, бироқ у ҳамон Эквадорнинг Лондондаги элчихонасида қолмоқда. Reuters агентлигининг маълум қилишича, WikiLeaks асосчиси 2012 йилда судга келмагани сабаб Вестминстер магистрат суди томонидан берилган ҳибсга олиш ордери ҳалигача ўз кучида.
