АҚШ президенти Дональд Трамп 20 май, шанба куни расмий ташриф билан Саудия Арабистонига етиб келди. Бу ҳақда The Washington Post нашрига таяниб, «Интерфакс» хабар берди.
АҚШ етакчисининг самолёти Ар-Риёд аэропортига келиб қўнди. АҚШ президенти сифатида илк хорижий сафарини амалга ошираётган Трампни аэропортда Саудия Арабистони қироли Салмон ибн Абдулазиз Ас-Сауд кутиб олди.
Нашрнинг қайд этишича, АҚШ президентига унинг рафиқаси Мелания, қизи Иванка ва куёви Жаред Кушнер ҳамроҳлик қилмоқда.
Америка ОАВларининг қайд этишича, ташрифнинг қизиқарли жиҳатларидан бири Трампга ҳамроҳлик қилаётган аёлларнинг ташқи кўриниши бўлади: мусулмон одатларига кўра аёллар жамоатга кўриниш берганида бошига рўмол ўраган бўлиши лозим.
Трампдан олдинги АҚШ президенти Барака Обаманинг рафиқаси Мишель давлат ташрифи вақтида боши очиқ ҳолда келгани Саудия Арабистони фуқароларининг норозилигига сабаб бўлганди. Мелания Трамп ҳам Саудияга рўмолсиз келди.
Изоҳ (0)