Федерал қидирув бюроси собиқ раҳбари Жеймс Коми Сенатнинг разведка бўйича қўмитаси очиқ мажлисида кўрсатма беради. Бу ҳақда қўмита раҳбарлари сенатор Ричард Бурр ва сенатор Марк Уорнер маълум қилди, деб хабар берди «Корреспондент.net».
«ФҚБ собиқ директори Жеймс Коми қўмитанинг очиқ мажлисида кўрсатма беришга розилигини билдирди», — деб Марк Уорнер Twitter’да ёзув қолдирди.
Баёнотда ёзилишича, мажлис АҚШда 29 май куни нишонланадиган Хотира кунидан сўнг бўлиб ўтади.
Сенаторлар Комидан «Россиянинг АҚШда 2016 йилда бўлиб ўтган сайловга аралашуви борасида унинг баҳоси»ни эшитиш умидида ва «сўнгги вақтларда ОАВлар томонидан кенг ёритилиб борилаётган ҳодисалар юзасидан тушунтиришлар» олишни мўлжаллаган.
Сенаторлар ФҚБ собиқ директорининг кўрсатмаси разведка қўмитасининг Россияга нисбатан мустақил олиб бораётган терговига фойдаси тегишига умид қилмоқда.
Эслатиб ўтамиз, АҚШ президенти Дональд Трамп Комини бюрони бошқаришга лойиқ эмас, дея вазифасидан озод этган эди.
Изоҳ (0)