Туркия Руанда ва собиқ Югославия бўйича Жиноий трибуналлар учун халқаро механизм (ЖТХМ)нинг 2016 йил сентябрида давлат тўнтаришига уринишга алоқадорликда айбланиб қўлга олинган судья Айдин Сефа Акайни озод қилиш ҳақидаги талабини бажармоқчи эмас. Бу ҳақда Туркиянинг БМТдаги доимий вакили Фаридун Синирлиўғли Хавфсизлик кенгашига ёзган хатида маълум қилди, деб ёзади «ТАСС».
Дипломат Туркия фуқароси Айдин Сефа Акай «2016 йил 15 июлдаги давлат тўнтаришига уриниш ортида турган Фатхулла Гулен террорчилик ташкилоти аъзоси айблови билан» ҳибсга олинганини эслатди.
«Ушбу жиноят Туркия жиноят кодексига мувофиқ жазога тортилишга лойиқ», — дея таъкидлади Синирлиўғли. Унинг сўзларига кўра, судья учун дахлсизлик ҳуқуқи амал қилмаган, чунки у ўз фаолияти доирасидан ташқарида содир этилган хатти-ҳаракатлар учун ҳибсга олинган.
Айдин Сефа Акай — Руанда бўйича халқаро трибунал томонидан кўриб чиқилиши якунланмаган ишлардан бири бўйича апелляция комиссияси аъзоси. 31 январь куни ЖТХМ қарор чиқариб, унда судьяни 14 февралдан кеч бўлмаган муддатда озод этишни ва унга нисбатан барча суд ишларини тугатишни талаб қилган эди.
Изоҳ (0)