2001 йил 11 сентябрь куни АҚШда юз берган терактлар натижасида қурбон бўлганларнинг қариндошлари Саудия Арабистонини судга бериб, қироллик ҳукуматини «Ал-Қоида» террорчилик тармоғини қўллаб-қувватлашда айблади, деб ёзади «ТАСС». 800 дан зиёд кишининг номидан берилган коллектив даъво 20 март, душанба куни Нью-Йоркнинг Манхэттен тумани федерал судига топширилди.
Даъвогарлар таъкидлашича, Ар-Риёд «Ал-Қоида»га молиявий ва бошқа моддий кўмакларни берган. Ҳужжатда қайд этилишича, Саудия Арабистони ҳукумати, гўёки, қироллик фуқаролари бўлган теракт ижрочиларининг камида уч нафари ушбу террорчилик тармоғига алоқадор бўлганини билган.
«Саудия Арабистони ўзини иккиюзламачи сифатида тутган, — дейилади даъвода. — У АҚШ ҳамда бошқа Ғарб мамлакатлари олдида ўзини ‘Ал-Қоида’ ва терроризм билан кураш олиб бораётган давлат сифатида тутди, аслида эса Саудия ҳукумати номидан фаолият олиб борган шахслар ‘Ал-Қоида’га аҳамиятли моддий кўмак тақдим этган».
Шу туфайли даъвогарлар таъкидлашича, Ар-Риёднинг кўмагисиз 11 сентябрь терактлари амалга ошмаган бўларди. Шу тариқа, «Саудия Арабистони теракт натижасида етган барча зарар учун даъвогарлар олдида жавобгардир». Даъво муаллифлари Саудия ҳукуматидан товон пули ундириб олишни талаб қилмоқда, аммо унинг ҳажми келтирилмаяпти.
Эслатиб ўтамиз, ўтган йили Конгресс вакиллар палатаси АҚШда халқаро террорчи ташкилотлар уюштирган ҳужумлар қурбонлари оиласига уларни қўллаётган давлатларга нисбатан мамлакат ҳудудида даъво қўзғаш ҳуқуқини берувчи ҳужжатни имзолаган эди.
Изоҳ (0)