Сурияда Пальмира шаҳри ёдгорликларининг вайрон этилишига алоқадор ИШИД террорчилик ташкилоти ҳарбий қўмондони йўқ қилинди. Бу ҳақда «РБК» хабар бермоқда.
Абу Ҳамид ас-Сукний тахаллуси билан танилган жангари Пальмира ва Дайр-аз-Зор орасидаги кичик шаҳарчада туғилган. У ИШИДнинг 2015 йилда Пальмирадаги ёдгорликларни яксон қилишга йўналтирилган баталёнига шахсан бошчилик қилган.
Жангарилар бошлиғи Сурия армияси билан Пальмира шаҳридан 15 километр нарида жойлашган Жебел-эл-Мозар тоғида бўлган тўқнашувда йўқ қилинган. Сурия армияси ўнлаб террорчиларни яксон қилиб, ИШИД назорати остидаги ҳудудларда жойлашган омборларнинг бир қисмини қайтариб олган.
ИШИД террорчилари Пальмирани биринчи бор 2015 йил май ойида эгаллаган эди. Сурия армияси 2016 йил мартида Россия ҳарбийлари кўмагида шаҳарни қайтариб олган. 2016 йил декабрида ИШИД жангарилари қайтадан Пальмирани қўлга киритди, 2017 йил мартида эса шаҳар қайта озод этилди.
Террорчилар назорати остида бўлган вақтда Пальмирадаги кўплаб тарихий ёдгорликлар йўқ қилинган, унинг ер ости омборларини портлатиб юборилган. Бундан ташқари террорчилар антик шаҳарнинг кўплаб ёдгорликларини яксон қилган, жумладан, 1800 йиллик тарихга эга иккита ибодатхона ҳамда Рим Триумфиал аркасини йўқ қилган.
2017 йилнинг январида жангарилар Пальмирадаги Рим амфитеатрининг бир қисмини портлатиб юборган. Бундан ташқари террорчилар тўрт томондан кириладиган иншоот — тетрапилионни ҳам яксон қилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)