Қримнинг Россияга қўшилганига уч йил тўлиши арафасида (18 март) Евроиттифоқ ярим оролнинг «ноқонуний аннексияси»ни ва Қримдаги инсон ҳуқуқлари билан боғлиқ вазиятни қораловчи баёнот билан чиқиш қилди, деб ёзади «РБК».
«Ўтган йил ичида ярим оролнинг давом этаётган ҳарбийлаштирилиши Қора денгиз минтақасида хавфсизлик соҳасидаги вазиятга таъсир ўтказишда давом этди, Қрим ярим оролидаги инсон ҳуқуқлари билан боғлиқ ҳолат эса ёмонлашишда давом этди», — дейилади Евроиттифоқ баёнотида.
Ўтган йилдаги каби, Брюссель БМТга кирувчи мамлакатларнинг барчасини БМТ Бош Ассамблеясининг 2014 йил 27 мартдаги «ноқонуний референдум» ўтказилиши ва кейинчалик Қримнинг Россияга қўшилишини қораловчи резолюциясида кўзда тутилган санкциялар режимига қўшилишга даъват этмоқда.
Бундан ташқари, Евроиттифоқ мамлакатлари вазирлари сўнгги йил ичида БМТ Бош Ассамблеяси Қрим бўйича инсон ҳуқуқларига алоқадор яна бир резолюция қабул қилинганини эслатди. 2016 йил 19 декабрдаги резолюцияда Бош Ассамблея Россия ҳукуматининг «дискриминация амалиётлари»ни қоралаган ва БМТ бош котибини Қримга халқаро кузатувчилар миссиясини юбориш «йўлларини топиш»га чақирган эди.
Изоҳ (0)