АҚШнинг янги сайланган президенти Дональд Трамп Ford компаниясига Мексикада завод қуришдан воз кечгани учун миннатдорлик билдирди. Бу ҳақда «Ведомости» хабар бермоқда.
«Ford компаниясига Мексикада янги завод қуришдан воз кечиб, АҚШда 700 та иш ўрни яратишга қарор қилгани учун раҳмат. Бу фақат бошланиши — кейинчалик бундан ҳам яхши бўлади», — деб ёзди Трамп Twitter’даги саҳифасида.
Ford Мексикада янги завод қуришдан воз кечди. Бунинг ўрнига компания Детройт четидаги Флэт-рок шаҳарчасида янги инновацион саноат маркази яратишга 700 миллион доллар инвестиция киритишга қарор қилди. Компания режаларига кўра, бу қўшимча 700 иш ўрни яратиш имконини беради. Компания Мексиканинг Сан-Луис-Потоси штати ҳокимиятига завод лойиҳаси харажатларини қоплаб беради.
Маълумки, ўз сайловолди кампаниясида Дональд Трамп АҚШнинг ўзида қайта саноатлаштириш ўтказиб, янги иш ўринлари яратишни, йирик корпорациялар ишлаб чиқаришни ишчи кучи арзон бўлган бошқа давлатларга олиб чиқиб кетишига йўл қўймасликни ваъда қилган эди. Жумладан, Трамп General Motors корпорациясини у Мексикада автомобиль ишлаб чиқариб, АҚШга божхона тўловларисиз олиб кираётгани учун танқид остига олган эди.
Изоҳ (0)