Ford Motor Мексикада қиймати 1,6 миллиард долларга баҳоланаётган яна бир завод қуриш режасидан воз кечди. Бу ҳақда компания томонидан тарқатилган пресс-релизда маълум қилинди, дея хабар беради «Интерфакс».
Бунинг ўрнига Ford Детройт (АҚШ) яқинидаги Флэт-рок шаҳарчасида янги инновацион ишлаб чиқариш маркази барпо этишга 700 миллион доллар йўналтиради. Ҳисоб-китобларга кўра, бунинг натижасида қўшимча 700 та янги иш ўрни яратилади.
Ford Мексиканинг Сан-Луис-Потоси шаҳрида янги завод қуриш ва Мехико яқинидаги завод ишлаб чиқариш қувватини кўпайтиришни мўлжаллаганди. Шу тариқа компания Мексикада чиқарилаётган автомобиллар сонини 2018 йилда 500 минг донага етказишни режалаштирганди.
Маълумот учун, олдинроқ АҚШнинг сайланган президенти Дональд Трамп Мексикада йиғилган Chevy Cruze машиналарини Америкага божхона тўловларисиз олиб кираётган General Motors’ни танқид қилиб, ишлаб чиқаришни АҚШга кўчириш ёки чегарада катта солиқ тўлашни таклиф этганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)