1990 йилларда машҳур бўлган америкалик рэпер Тупак Шакур рок-н-ролл шон-шараф залининг фахрий аъзосига айланади. Маросим 2017 йилнинг 7 апрель куни бўлиб ўтади, деб хабар бермоқда TJournal.
Тупак Шакур билан биргаликда рок-н-роллнинг шон-шараф залига хонанда Жоан Баэз ҳамда Pearl Jam, Yes, Electric Light Orchestra ва Journey гуруҳлари киритилади.
Шон-шараф залига дастлабки альбоми чиққанига 25 йилдан ошмаган артист (гуруҳ)лар киритилади. Тупакнинг илк альбоми – 2Pacalypse Now 1991 йили дўконларда пайдо бўлганди.
Ҳар йили рок-н-роллнинг шон-шараф залига кириш учун дунё бўйлаб 40 артист (гуруҳ) даъвогарлик қилади. Шулардан 5 нафари расмий сайтда овоз бериш йўли орқали аниқланади.
Одатда, рок-н-роллнинг шон-шараф залига ушбу жанрда фаолият олиб борган ёки фаолият олиб бораётган мусиқачилар киритилади. Аммо, мусиқа саноатига катта таъсир ўтказган баъзи шахслар (гуруҳлар), жумладан, N.W.A (2016 йил) ва Public Enemy (2013 йил) рок-н-роллнинг шон-шараф залига киритилганди.
Тупак Шакур мусиқа саноати тарихидаги энг нуфузли қўшиқчилардан бири саналади. У 1996 йили душман ҳисобланган тўда аъзолари томонидан отиб ўлдирилган. Айни вақтда дунё бўйлаб Тупак Шакурнинг альбомлари 75 миллион тиражда сотилган.
Маълумот учун, 2017 йилда Тупак Шакур ҳаёти ҳақидаги All Eyez on Me номли фильмнинг премьераси бўлиб ўтади. Фильмда бош ролни актёрлик фаолиятини бошлаётган кичик Деметриус Шипп ижро этган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)