Maroon 5’нинг «Sugar» қўшиғига ишланган клип ҳозиргача YouTube’да 1,6 миллиард марта кўрилган ва видеосервис тарихидаги энг кўп кўрилган видеолардан бири ҳисобланади (14-ўрин). Ўша 1,6 миллиард томошабин орасида сиз бўлмасангиз, имкониятни қўлдан бой берманг:
Энди Илҳом Фармоновнинг «Яшанг» қўшиғига ишланган клипни томоша қилинг (бу юмуш вақтингизни кўп олмайди):
«Sugar»нинг клипи қандай суратга олинган?
«Sugar» қўшиғи ёзиб бўлинганидан сўнг, 2014 йили Maroon 5 яккахони Адам Левин ўзининг яқин режиссёр дўсти Дэвид Добкинга клип олишда ёрдам кўрсатишни сўраб мурожаат қилган.«Адам билан танишганимга 10 йилдан ошган, хотинимнинг ота-онаси Адамнинг бува-бувилари билан оилавий дўст, Рождествони ҳам ҳар йили у билан бирга кутиб оламан. Кўпдан бери бирга бирор нарса қилиш ҳақида ўйлардик, лекин ҳеч бунинг мавриди келмасди», — деганди Добкин қўшиққа ишланган клип намойишидан сўнг.
Режиссёр клипда Maroon 5 ва унинг мухлислари ўртасидаги боғлиқлик кўриниб туришини хоҳлаган ва видеони Адамнинг она шаҳри — Лос-Анжелесда, актёрлар эмас, ҳақиқий одамлар иштирокида суратга олиш истагини билдирган.
Добкин 2005 йили актёрлар Оуэн Вилсон ва Винни Жонс иштирокида «Чақирилмаган меҳмонлар» номли фильмни суратга олган. У тасодифий тўйларга амаллаб кириб, қизлар билан танишишни одат қилган икки дўст ҳақида ҳикоя қилади. «Чақирилмаган меҳмонлар» кинотанқидчилар томонидан илиқ кутиб олинган, 40 миллион бюджети билан 280 миллион доллардан ортиқ даромад олган.
Maroon 5’нинг қўшиғи учун Добкин шундай ғоя таклиф қилади — ҳақиқий тўйларга меҳмонга бориб, келин-куёвларни ҳайрон қолдириш. Бу ғоя Адамга ҳам маъқул тушади. «10 йил давомида ҳамма мендан шу фильмга боғлиқ нимадир қилишни сўрарди, — дейди Добкин. — Бироқ мен ўтмишга қайтишни истамасдим, чунки у ҳақиқатан ҳам яхши фильм чиққан эди. Бироқ клип ғояси миямизга ўрнашиб қолганидан сўнг, шундай клип олиш жуда зўр бўлади, деган фикрга келдик».
Клип концепцияси тайёр бўлганидан сўнг, «бостириб бориладиган» тўйлар қидирила бошланди. Дастлаб клип суратга олинаётгани ҳақида ҳеч ким, ҳатто тўйхона ва тўй эгаси ҳам билмаслиги керак, деган фикр бўлган. Бироқ кейинроқ бу ҳақда камида бир киши билгани маъқул, деган қарорга келинган. Шунда ҳам тўйхона эгаларига клип Maroon 5 учун олинаётгани аниқ билдирилмай, «жуда машҳур ва бир неча ‘Грэмми’ларни қўлга киритган хонанда кутилмаган меҳмон бўлиши» айтилган.
Кейинги қадам — гуруҳнинг тўй бўлаётган залга яширинча кириб келишини таъминлашдан иборат эди. Шунда Добкин бир тугмани босиш билан пардалари ерга тушиб кетадиган чодирни ишлаб чиққан. Сўнг, Лос-Анжелесда тўйлар ўтказиладиган қатор жойларда бўлиб, қайси бирида шу чодирни ўрнатиш мумкинлигини белгилаган.
Репетиция кунларининг бирида Адам Левин: «Одамларга бизнинг бу ишимиз ёқмаса-чи? Тўйни бузиб қўйсак-чи?», деган саволни ўртага ташлаб, клип ғоясини шубҳа остига олган. Шу билан бирга, қуйидагича «компенсация» таклиф қилган: «Рақс майдонини одамлардан бўшатамиз-да, мен гитарачим Жаймс Валентайн жўрлигида ‘She Will Be Loved’нинг акустик версиясини фақат келин-куёв учун, уларнинг биринчи оилавий рақси учун куйлаб бераман».
Съёмкага бир неча кун қолганида, баъзи тантана залларининг масъуллари асабийлашиб, Добкин билан келишувни бекор қилишни бошлаган. Шунда режиссёр уларнинг ҳар бири билан алоҳида кўришиб, махфий меҳмон аслида Maroon 5 эканлигини билдирган. Охир-оқибат, уларнинг аксарияти Адам Левиннинг қўшиқлари ихлосманди бўлиб чиққан.
Тасвирга олиш куни ҳар бир тўйда чодирни ўрнатиб, келин-куёвни ҳайрон қолдирган кўйи қўшиқ айтиб чиқиб кетиш учун гуруҳда 20 дақиқача вақт бўлган. Клипдаги биринчи — яҳудийларнинг тўйида, чодир ўрнатилаётган ва келин-куёв ҳали ўз курсисида ўтирган вақтда, Maroon 5 йигитлари лифтда қамалиб қолган. Охири улар лифтдан амаллаб чиқиб, тўққиз қават югурган ва тасвирга олиш жойига етиб келган.
Добкиннинг ёдга олишича, суратга олиш ишлари якунига етганида Maroon 5 аъзолари унга худди: «Эй, Худо! Ҳаммаси жуда ҳам ажойиб бўлди! Кейинги тўй қаерда?», деб сўрашга тайёр турган эди.
«Яшанг» клипи тарихи ҳақида ёзиш шарт эмас
Аксинча, унинг қайси лавҳалари «Sugar»ники билан бир хил эканини кўрсатиб ўтиш осонроқ.
«Sugar»нинг бошида Адам Левин: «Бугун 2014 йил 6 декабрь. Биз Лос-Анжелес бўйлаб сайр қилиб, имкон қадар кўпроқ тўйларга бостириб кириш учун тўпландик», — дейди. «Яшанг»нинг бошида эса Илҳом Фармонов: «Юртимизда байрам, шодиёна, хурсандчилик. Мана, бугун ҳам халқимизнинг хизматига шайландик», — дейди.
«Sugar»да ҳам, «Яшанг»да ҳам ёрдамчилар целлофанга ўралган тахталарни тўйхонага олиб киради.
«Sugar»да ҳам, «Яшанг»да ҳам ёши каттароқ киши: «Нима қиляпсанлар ўзи?», деб эътироз билдиради ва гуруҳ вакили уни тинчлантиришга уринади.
«Sugar»да ҳам, «Яшанг»да йўлда қизлар гуруҳ аъзоларини кўриб қолиб, улар билан селфига тушади (ҳа, «Sugar»да полиция келиб, халал беради + «Яшанг»да қизлар фақат Илҳом Фармонов билан селфига тушади).
«Sugar»да ҳам, «Яшанг»да ҳам тантана зали ошхонасидаги ошпазлардан бири ёнидан машҳур хонанда ўтиб кетганидан ҳайратда қолади («Sugar»да, албатта, бу вазият ишонарлироқ чиққан).
Ва ниҳоят, «Sugar»да ҳам, «Яшанг»да ҳам кутилмаган меҳмондан келин-куёв жуда ва жуда ҳайратда қолади.
Шунчаки, «Sugar»да одамларнинг ҳиссиётлари табиий ва самимий, «Яшанг»да эса актёрлар ижроси бутун клип каби сохтароқ чиққан.
Хулоса
Maroon 5’нинг «Sugar» қўшиғига ишланган клип премьераси 2015 йил 14 январь куни бўлиб ўтган. Шундан роппа-роса 666 кун ўтиб — 2016 йил 10 ноябрида Илҳом Фармоновнинг «Яшанг» қўшиғига ишланган клип YouTube’га чиқарилган ва ҳозиргача 20 минг марта кўрилган.Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)