Том Хенкс мухлисаси гаровда ғолиб чиқиши учун унинг сурати билан селфига тушди

Америкалик актёр Том Хенкс мухлисаси гаровда ғолиб чиқиши учун унинг сурати билан селфига тушди. Бу ҳақда Mashable хабар бермоқда.

Канаданинг Торонто шаҳрида яшовчи Зена Гопалнинг айтишича, у дўстлари билан ким биринчи бўлиб Том Хенкс билан суратга туша олиши борасида гаров ўйнаган. Гаровда ғолиб чиқишни ният қилган қиз актёрга лама билан тушган селфиси ва гаров шартлари ёзилган хатни йўллаган.

Орадан тахминан уч ҳафта ўтиб, актёрдан керакли фотосурат илова қилинган жавоб келган. Конвертда ёзув машинкасида битилган хат ҳам бўлиб, унда Хенкс соқоли олинмагани учун узр сўраган. Унинг тушунтиришича, навбатдаги фильмда суратга тушиши учун унга соқол ва мўйлов керак эди. Шунингдек, актёр Торонто ҳақида ҳам илиқ фикрлар билдирган.

«Торонтоми? ҳам ажойиб шаҳар. Тез ўсаяпти, айниқа, соҳил бўйидаги ҳалиги осмонўпар бинолар. Ўйлашимча, у ердан чиройли манзаралар кўринади. Сўнгги бор сизларнинг шаҳрингизда кинофестиваль вақтида бўлгандим», - деб ёзган Том Хенкс.

CBC’га берган интервьюсида Гопал актёрнинг жавобидан «мутлақ фалаж» бўлиб қолганини айтиб ўтди.

«Бу жавоб хати мени кулишга мажбур қилиб, бутун кун кайфиятим юқори бўлишига сабаб бўлди. У мухлисларидан келган хатларни ўқишининг ўзи-да ажойиб!», - деди Зена Гопал.

Сентябр ойида Хенкс хиёбон бўйлаб югуриш чоғида нотаниш келин-куёвнинг тўй фотосессиясида қатнашган эди. У ёшларни қутлаб, кўп ўтмай ижтимоий тармоқлардаги саҳифаларида улар билан бирга тушган селфисини эълон қилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.