Ўзбекистон давлат консерваториясида тиббиёт фанлари номзоди, Европа фониатрлар уюшмаси, Россия «Голос» академияси, Россия оториноларингологлар уюшмаси аъзоси Камола Султанова иштирокида амалий-ижодий учрашув бўлиб ўтди. Бу ҳақда журналист Феруз Муҳаммад «Дарё»га маълум қилди.
Асли Тошкент шаҳрида туғилиб, бугун фаолиятини Россияда давом эттираётган Камола Султанова учрашувда нафақат йиғилганларнинг саволларига бирма-бир жавоб берди, шу билан бирга, овози ва томоғидан шикояти бўлган талабаларни кўрикдан ўтказди ва тегишли маслаҳатлар берди.
Фонограммада куйлашга бутунлай қарши бўлган Камола Султанова жонли ижрода концерт бераётган ҳар бир хонанда билан яккама-якка ишлаб, унинг овоз имкониятларини тўлиқ назорат қилиш билан максимал даражага эришиш мумкинлигини асослаб берди.
Овоз бузилишларини даволаб, унинг имкониятларини кенгайтириш усулларини ўрганадиган ва ўргатадиган фан — фониатрияга бағишланган мазкур учрашувнинг ўзида бутун аудитория билан биргаликда жамоавий машқлар бажарилди. Ижодий учрашув қизғин баҳс ва мунозарага айланиб кетди.
Учрашув якунлари бўйича журналист Феруз Муҳаммад тадбирда қатнашган Ўзбекистон халқ артисти Муяссар Раззоқова билан суҳбатлашди.
— Мазкур тадбирнинг, фониатр хизматининг талабаларга ҳамда профессионал хонандаларга аҳамиятли томони нимада деб ўйлайсиз?— Аввало, Камола Султановани таклиф қилиб, ушбу тадбирни уюштиргани учун консерватория раҳбариятига миннатдорчилик билдирамиз. Бу эстрада хонандалиги, академ хонандалик ва анъанавий хонандалик кафедраларининг талабалари учун жуда фойдали учрашув бўлди. Бундай учрашувларнинг бўлиб тургани яхши, бироқ фониатр билан доимий равишда ишланса — жуда соз. Камола Султонова талабаларимизга қаерда, қандай даволаниш кераклигини амалий кўрсатиб, ташхис қўйиб берди. Икки соатлик тадбир давомида тиббиёт нуқтаи назаридан ҳам жуда кўп ва фойдали билимларга эга бўлдик. Камола Султановага ўхшаган ўз ишининг усталари билан яна кўп учрашувлар уюштирилишини сўраб қолардик.
— Ўзбекистонда фониатрлар етарлими?— Йўқ, етарли эмас, бундай мутахасислар бармоқ билан санарли. Борлари ҳам Камола Султановачалик катта тажриба ва малакага эга эмас. Шу соҳадаги мутахасислар сонини кўпайтириб, катта клиника очилса, жуда яхши иш бўларди. Талабаларимизнинг овози бор, лекин томоқ билан боғлиқ турли касалликлар сабаб кутилган ижрони қила олмайдиган ҳолатлар ҳам бўлиб туради. Бундай вазиятдан чиқишнинг биргина йўли — ишончли фониатрга мурожаат қилишдир.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)