Subaru Impreza Японияда «Йил автомобили» деб топилди

Япониянинг «Йил автомобили» танлови ташкилотчилари Subaru Impreza седанини энг яхши машина деб топди. Автомобиль тегишли равишда иккинчи ва учинчи ўринларни эгаллаган Toyota Prius ва Audi А4 ни ортда қолдирди, дея хабар беради Motor. 

Янги Impreza март ойида Нью-Йоркдаги моторшоуда илк бор намойиш этилди. Японияда модель сотуви 13 октябрда бошланди, бир ойдан кейин эса компания 11 мингдан ортиқ буюртма тўплади. Бу Subaru’нинг ҳар ойлик сотувлар бўйича дастлабки режасидан салкам 4 баробар ошиқ бўлди. Ишлаб чиқарувчига кўра, барча буюртмаларнинг 51 фоизи бошқа брендлар эгаларидан келиб тушган. 

Янги авлод Impreza япон маркасининг барча бўлажак моделлари учун асос бўлиб хизмат қиладиган SGP (Subaru Global Platform) модул платформасида ишга туширилди. Модель тўлиқ узатмали симметрик тизими ва 152 от кучига эга двигатель билан жиҳозланди. 

Маълумот учун, ўтган йили Mazda MX-5 родстери Японияда йил автомобили деб топилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.