LaFerrari аукционда 7 млн долларга сотилди, тушган маблағ Италиядаги зилзилада жабрланганлар фондига ўтказилади

Ferrari автоконцерни Дэйтон-Бичда (АҚШ) Sotheby’s ўтказган аукционда сериядан ташқари LaFerrari автомобилини 7 миллион долларга сотди. Тушган маблағ Италияда 2016 йил ёзида содир бўлган зилзилада жабрланганларга ёрдам фондига ўтказилади, дея хабар беради «Ведомости».

Концерн ушбу моделнинг бор-йўғи 499 автомобилини чиқаришни мўлжаллаганди. LaFerrari — Ferrari тарихидаги илк гибрид суперкари.

Автомобиль аукционда атиги 10 дақиқа ичида номи ошкор этилмаган харидорга сотилди. Унинг баҳоси дастлабки нархидан беш баробар ошиб кетди. Суперкар Ferrari’нинг кимошди савдоларида сотилган энг қимматбаҳо автомобили бўлди.

Эслатиб ўтамиз, жорий йил 24 августида Италия марказида 6,4 балли зилзила рўй берди. 300 нафарга яқин киши мазкур табиий офат қурбони бўлди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.