«Ўзбектуризм» миллий компанияси делегацияси шу йил 21 ноябрь — 2 декабрь кунлари Корея Республикасида бўлди. Сафар давомида Жанубий Корея сайёҳлик ташкилотлари вакиллари билан учрашувлар ташкил этилди, ушбу мамлакатнинг қатор ҳудудлари, маданий мерос объектлари, қўриқланадиган табиий ҳудудлари фаолияти билан танишилди. Бу ҳақда ЎзА хабар берди.
«Ўзбектуризм» миллий компанияси вакиллари Ўзбекистоннинг туризм соҳасидаги салоҳияти тақдимотини ўтказди. Тақдимот иштирокчиларига Ўзбекистоннинг бой тарихий-маданий мероси, Қорақалпоғистон, Самарқанд, Бухоро, Хоразм, Қашқадарё ва бошқа ҳудудларидаги диққатга сазовор жойлар ҳақидаги бой маълумотлар тақдим этилди. Мамлакатда туризм инфратузилмасини ривожлантириш ва сайёҳлик хизматлари экспортини янада ошириш, соҳа учун юқори малакали кадрлар тайёрлаш бўйича амалга оширилаётган ишлар ҳақида ахборот берилди.
Жанубий кореялик экспертлар билан биргаликда туризм соҳасидаги ҳамкорликнинг бугунги ҳолати ва уни ривожлантириш истиқболлари муҳокама этилиб, Ўзбекистон ҳамда Жанубий Кореяда экотуризмни ривожлантиришни қўллаб-қувватлаш масаласи бўйича тажриба ва фикр алмашилди.
Ўзбекистон туризм саноати вакилларининг сафари қизиқарли тақдимот маросимлари, ўзаро манфаатли музокараларга бой бўлди. Ўзбекистонда туризмни ривожлантириш борасида амалга оширилаётган ислоҳотлар, соҳа кадрларини тайёрлаш тизими, экотуризмни оммаллаштириш дастурлари ҳақида маълумот берилди.
Ташриф чоғида ўтказилган учрашув ва тадбирлар Жанубий Корея сайёҳлик бозорининг сўнгги тенденциялари билан танишиш, ушбу соҳада ҳамкорликни кенгайтириш ва Ўзбекистоннинг мазкур йўналишдаги салоҳиятини намойиш этиш имконини берди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)