Президент сайловига тайёргарлик кўриш ва уни ўтказиш жараёнини кузатиш учун Ўзбекистонга келган хорижий давлатлар ва халқаро ташкилотлар вакиллари жойларда ташкил этилаётган учрашувлар доирасида Олий Мажлис Қонунчилик палатасига ташриф буюрди. Бу ҳақда палата матбуот хизмати хабар бермоқда.
Қонунчилик палатаси Халқаро ишлар ва парламентлараро алоқалар қўмитаси аъзолари З. Умаров ва Ф. Эшматованинг Қозоғистон Республикаси Парламенти Мажлиси (қуйи палата) депутатлари Ф. Каратаев ва К. Ержан билан мулоқоти бўлиб ўтди.
— Президент сайлови ва унга тайёргарлик жараёни ҳақида ОАВ орқали батафсил маълумот олдик. Президентликка партиялардан кўрсатилган номзодларнинг чиқишларини кузатиб, улар бир-бирлари ва сайловчиларни ҳурмат қилишларига гувоҳ бўлдим. Ушбу сайловга одамлар масъулият билан қарашмоқда, — дейди Кудайберген Ержан.
Қайд этишим жоизки, Ўзбекистон мен туғилган жой ва бу менга мамнуният бағишлайди. Бу ерда энг яқин дўстларим бор. Улар билан кўришиш мен учун ёқимли. Биз аввалроқ Қозоғистондаги Ўзбекистон элчихонасида бўлдик. У ерда ҳам сайловга тайёргарлик юксак даражада ташкил этилган. Умуман, хорижда яшаётган фуқароларга мазкур сайловда эркин иштирок этиш ва овоз беришлари учун барча шароитлар яратилган.
Бу, ўз навбатида, фуқароларнинг ўз бурчларини амалга ошириш, конституциявий ҳуқуқларини рўёбга чиқаришлари учун муҳим аҳамиятга эга. Зеро, бу кунда ўзбек халқи мамлакат келажаги учун овоз беради.
Сайловда кузатувчи сифатида иштирок этаётган давлатлар рўйхатини кўриб амин бўлдимки, ушбу муҳим сиёсий тадбирда кўплаб хориж мамлакатлари ва халқаро ташкилотлардан кузатувчилар иштирок этмоқда. Бу сайловнинг очиқлик ва ошкоралик, умумэътироф этилган демократик тамойилларга мувофиқ ўтказилишидан далолат беради. Негаки, дунёда Ўзбекистонга бериладиган баҳо жуда ҳам юқори. Шундай экан, халқингизга муносиб номзод танлашда омад тилайман.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)