Хейла Хамад ал-Мекеими: Президент сайлови Ўзбекистон истиқболи бардавомлигини белгилаб беришда муҳим аҳамият касб этади

Ўзбекистон Республикаси Олий Мажлиси Қонунчилик палатасида Президент сайловига тайёргарлик кўриш ва уни ўтказиш жараёнини кузатиш учун мамлакатга келган Кувайт ахборот вазирлиги давлат котибининг ёрдамчиси Хейла Хамад ал-Мекеими билан учрашув бўлиб ўтди. Бу ҳақда палата матбуот хизмати маълум қилди.

Олий Мажлис Қонунчилик палатаси Ахборот ва коммуникация технологиялари масалалари қўмитаси раиси И.Абдуллаев меҳмонга мамлакатда амалга оширилаётган демократик ислоҳотлар, жумладан, Ўзбекистон Республикаси Конституцияси ва сайлов қонунчилигига сайлов жараёнини янада демократлаштириш ва эркинлаштириш бўйича киритилган ўзгартиш ва қўшимчалар, партиялар фаоллиги ҳамда ОАВни эркинлаштириш борасидаги янгиликлар ҳақида сўзлаб берди.

Учрашувда Ўзбекистон ва Кувайт ўртасидаги ҳамкорлик янада ривожланиб, ўзаро манфаатли алоқалар мустаҳкамланиши ҳар иккала давлат учун муҳимлиги қайд этилди.

— Президент сайлови мамлакатингиз истиқболи, иқтисодий-маънавий тараққиётининг бардавомлигини белгилаб беришда муҳим аҳамият касб этади, — дейди Хейла Хамад ал-Мекеими хоним. — Сайлов жараёнида жаҳоннинг 46 мамлакати ва қатор халқаро ташкилотлардан кузатувчилар қатнашаётгани Ўзбекистонга бўлган улкан қизиқиш ва эътиборнинг амалий ифодасидир. Биз сиёсий жараёндаги барча баҳс-мунозара, мулоқот ва ахборотларни тезкорлик билан аҳолига етказишга хизмат қилаётган пресс-клубда бўлиб, номзодларнинг сайловолди дастурлари билан яқиндан танишдик. У ерда партиялар аъзолари ўртасида ўзаро ҳурмат билан ўтказилаётган баҳс-мунозараларнинг гувоҳи бўлдик.

Сайловолди кампаниясининг юқори даражада ташкил этилгани одамларга муносиб номзодни танлашга ёрдам бериши билан бирга, Президент сайлови жараёнининг эркин, очиқ ва ошкора ўтаётганидан дарак беради.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.