Америкалик қўшиқчи Боб Дилан Барак Обаманинг Нобель мукофотининг америкалик лауреатлари билан учрашувига келмади. Учрашув 30 ноябрь куни Оқ уйда бўлиб ўтди. Бу ҳақда президентнинг матбуот котиби Жош Эрнест маълум қилди, деб ёзади Meduza.
Диланнинг учрашувга нима сабабдан келмаганлиги маълум қилинмаган. The Washington Post нашрининг маълум қилишича, мусиқачининг вакили журналистларнинг саволларига жавоб бермаган.
Эслатиб ўтамиз, америкалик мусиқачи ва қўшиқчи шоир Боб Дилан адабиёт бўйича 2016 йилги Нобель мукофоти совриндори бўлди. У «Америка қўшиқчилик анъанаси доирасида янги поэтик ибораларни яратгани учун» мукофотга лойиқ деб топилди.
АҚШ президенти Барак Обаманинг Боб Дилан ижодининг мухлиси эканлиги маълум. Мусиқачи Нобель мукофотининг лауреати бўлганлиги ҳақида маълум қилинганда, президент Twitter’даги саҳифасига «Севимли шоирларимдан бири Боб Диланни ҳақли мукофот билан табриклайман», деб ёзган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)