Ўзбек Миллий академик драма театрида Бердақ номидаги Қорақалпоқ давлат мусиқали театри ижодкорлари ижросида Иззат Султон асари асосида саҳнага қўйилган «Имон» спектакли намойиш этилди. Бу ҳақда ЎзА хабар берди.
Узоқ йиллар мобайнида Ўзбек Миллий академик драма театрида ижро этилган «Имон» спектакли санъат ихлосмандларига яхши таниш. Инсон ҳар қандай шароитда ўз виждонига қулоқ тутиб иш кўриши, турли мураккаб, чигал вазиятларда ҳалоллик, поклик, инсоф ва диёнат сингари чин инсоний фазилатлар билан муносиб йўл топишдек эзгу ғоя мазкур асар мазмунига сингдирилган.
– Имон, виждон, ор-номус тушунчалари ҳамиша инсон маънавиятида ўзига хос маёқ вазифасини ўтайди, – дейди Бердақ номидаги Қорақалпоқ давлат мусиқали театри директори Қолбой Турдиев. – Бу тушунчалар замонлар оша ўзгармай келаётган, миллий қадриятларимизнинг ажралмас бўлаги саналади. Спектакль томошабинни доим эзгуликка, виждони билан иш кўришга ундаши боис уни халқимиз севиб томоша қилади.
Спектаклни Ўзбекистон ва Қорақалпоғистон халқ артисти Ёдгор Саъдиев саҳналаштирган. Режиссёр – Қорақалпоғистон санъат арбоби Бердибай Утебаев. Саҳна безаклари ва декорацияларини Қорақалпоғистон санъат арбоби, рассом Рихат Асқаров яратган. Ўзбек ва қорақалпоқ тилларидаги ушбу спектаклда асосий ролларни Ёдгор Саъдиев, Азиз Назаримбетов, Алинай Бердибаева, Сапаргул Даулетова, Мийригул Мамбетумратова, Гулсара Жуманиязова, Фарит Узақбергенов, Бахтияр Абденов ижро этмоқда.
Изоҳ (0)