Москвада полиция Space гуруҳи етакчиси Дидье Маруани ва юрист Игорь Труновни қўлга олди. Бу ҳақда Труновнинг манфаатларини ҳимоя қилувчи адвокат Людмила Айвар маълум қилди, дея хабар беради «РБК».
«Томонлар узоқ вақт музокаралар олиб борди. Улар муаллифлик ҳуқуқи бузилиши ва Маруанига товон пули тўланиши масаласини тинч йўл билан ҳал этишга уринган. Киркоров бунга тайёрлигини билдириб, банкда учрашишни таклиф этган. Маруани ва Трунов банкка келганида полиция уларни қўлга олди», — дея изоҳ берди Айвар.
Ўз навбатида, Филипп Киркоровнинг адвокати Александр Добровинский Маруани ва Трунов мижозидан 1 миллион евро таъма қилгани учун қўлга олинганини маълум қилди.
«Бу ҳолат чиндан ҳам мижозимнинг мурожаатидан сўнг юз берди. Улар Киркоровдан қўшиқ учун 75 миллион рубль ундирмоқчи бўлган», — дея таъкидлади Добровинский.
Ноябрь бошида Space Филипп Киркоровнинг «Шафқатсиз севги» қўшиғида муаллифлик ҳуқуқи бузилганини билдириб, Москва шаҳар судига мурожаат этганди. Гуруҳ манфаатларини ҳимоя қилган Игорь Труновга кўра, экспертлар мазкур қўшиқда Дидье Маруанининг Symphonic space dream композициясидан қисман фойдаланилганини аниқлаган. Судга берилган даъво суммаси 75 миллион рублдан иборат бўлган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)