Баҳром Назаровнинг концерт дастуридан фоторепортаж

26—27 ноябрь кунлари Тошкентдаги «Истиқлол» санъат саройида хонанда Баҳром Назаровнинг «Бахт учун» деб номланган концерт дастури бўлиб ўтмоқда. Дастурнинг биринчи кунида меҳмон бўлган журналист Феруз Муҳаммад концерт таассуротлари билан ўртоқлашди.

Уч бўлимдан иборат концерт дастури белгиланган вақтидан 15 дақиқа кеч бошланди. Ҳар бири саккиз қўшиқдан иборат бўлимларнинг дастлабкисини «Яна келдим» номли тарона очиб берди.

Биринчи бўлимда хонанда, шунингдек, «Мен бўлай», «Учрадим», «Андижонда», «Кулиб деди», «Айрилдим», «Гапим бор», «Кўзи жайрон» сингари тароналарни куйлади. «Айрилдим» таронасини куйланган вақтда, томошабинлар қўл телефонларининг чироқлари ёрдамида бутун «Истиқлол»ни «юлдузлар»га тўлдирди.

Дастурда куйланган тароналарнинг қарийб ҳар бирига алоҳида рақс тайёрлангани ҳам эътиборга молик. Бу рақсларда раққосаларнинг либосларига ҳам алоҳида эътибор қаратилган. Рақс усталарининг чиқишлари ичида энг эътиборга молиги эса «Бахт учун» қўшиғига ишланган йигит ва қизнинг рақси бўлди, десак муболаға бўлмас.

Концерт дастурида «Дизайн» кулгу жамоаси йигитлари меҳмон сифатида чиқиш қилди. Жамоанинг аввалги концерт дастурларида ҳам кўрсатилган баъзи саҳна кўринишлари ҳисобга олинмаса, улар залга йиғилган томошабинларга хушкайфият улаша олди.

«Дизайн» аъзоларидан бирининг: «Баҳром Назаров жонли ижрода куйлай оладими?», деган саволига хонанда ўз устози Озодбек Назарбековнинг «Мажнунтолнинг новдалари» номли қўшиғини жонли куйлаб берди. Кутилмаган бу импровизацияни мухлислар давомли ва гулдурос қарсаклар билан олқишлади.

Дастурда мумтоз адабиёт дурдоналари — ғазаллар асосида тайёрланган кўплаб қўшиқлар ҳам куйланди. Хусусан, концертнинг иккинчи бўлими Алишер Навоийнинг «Ё Раб» номли ғазалига ёзилган қўшиқ билан бошланди.

Бундан ташқари, концертда Огаҳий, Маҳтумқули, Увайсий, Феруз каби мумтоз адабиёт намоёндаларининг шеърлари асосида тайёрланган қўшиқлар ҳам куйланди. Замондош шоирлардан эса Жаъфар Муҳаммад, Хушнуд Дарвеш сингари ижодкорларнинг шеърларидан фойдаланилган.

«Иккинчи бўлимда куйланган ‘Етимлар’ қўшиғи узоқ вақт мухлисларнинг ёдидан чиқмаслиги аниқ. Тарона ота-онасидан эрта айрилган, изтироб-у ҳасратда қолган ўғил тилидан, қалбларни ларзага келтирар даражада куйланди. Хонанда ҳам волидасидан жуда эрта айрилиб қолгани кўпчиликка сир эмас. ‘Етимлар’ қўшиғи иккинчи бўлимнинг чўққиси бўлди», — деб алоҳида таъкидлайди Феруз Муҳаммад.

«Бахт учун» деб номланган тарона билан бошланган сўнгги бўлим хит-қўшиқлар кетма-кетлиги билан барчага кўтаринки кайфият бахш этди. Дастлаб хонанданинг янги ижод маҳсулларидан бўлмиш «Сен кулганда», «Камтар бўл», «Мастона», «Қизга боқ» тароналари ушбу бўлимга файз берган бўлса, якунда хонанданинг энг хит ва рақсбоп тароналари — «Лола-лола», «Қарамадинг» ва «Пари-пари» куйланди.

Бир нафасда ва аъло даражада ўтган концерт дастурининг биринчи кунига «Пари-пари» қўшиғи чиройли якун бўлди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.