«Ўзбекфильм» киностудиясида режиссёр Зулфиқор Мусоқовнинг янги «Дадам бетоб» фильмини яратишнинг монтаж ва сайқал бериш босқичи якунланмоқда, деб ёзади «Газета.uz». Картина 9 октябрь куни 90 ёшида вафот этган таниқли польшалик режиссёр Анжей Вайда хотирасига бағишланган.
Фильмда бош ролларни «Хазонрезги» картинаси орқали танилиб улгурган актёрлар Бахтиёр Абдуллаев, Феруза Саидова ҳамда театр ва кино юлдузи Фарҳод Абдуллаев ижро этади. «Дадам бетоб» дастлаб ўзбек тилида чиқади, кейинроқ рус тилидаги версиясини ҳам кўриш мумкин бўлади.
Картина 1 соату 30 дақиқа давом этади. Суратга олиш ишлари асосан Тошкентда олиб борилган. Премьера санаси яқин орада эълон қилинади.
Зулфиқор Мусоқов нашрга маълум қилишича, фильм ҳар биримиз билан юз бериши мумкин бўлган оддий ҳикояни сўзлайди. Бахтли ҳаёт кечираётган қишлоқ аёли эри инсультга чалингач, пул ишлаб топиш мақсадида эрининг машинасини миниб, киракашлик қила бошлайди. Йўловчилардан бири билан танишувнинг оқибати машъум бўлиб чиқади. Фильм триллер элементларига эга ҳамда юморга бой йўл киноромани жанрида суратга олинган.
Изоҳ (0)