26—27-noyabr kunlari Toshkentdagi “Istiqlol” san’at saroyida xonanda Bahrom Nazarovning “Baxt uchun” deb nomlangan konsert dasturi bo‘lib o‘tmoqda. Dasturning birinchi kunida mehmon bo‘lgan jurnalist Feruz Muhammad konsert taassurotlari bilan o‘rtoqlashdi.
Uch bo‘limdan iborat konsert dasturi belgilangan vaqtidan 15 daqiqa kech boshlandi. Har biri sakkiz qo‘shiqdan iborat bo‘limlarning dastlabkisini “Yana keldim” nomli tarona ochib berdi.
Birinchi bo‘limda xonanda, shuningdek, “Men bo‘lay”, “Uchradim”, “Andijonda”, “Kulib dedi”, “Ayrildim”, “Gapim bor”, “Ko‘zi jayron” singari taronalarni kuyladi. “Ayrildim” taronasini kuylangan vaqtda, tomoshabinlar qo‘l telefonlarining chiroqlari yordamida butun “Istiqlol”ni “yulduzlar”ga to‘ldirdi.
Dasturda kuylangan taronalarning qariyb har biriga alohida raqs tayyorlangani ham e’tiborga molik. Bu raqslarda raqqosalarning liboslariga ham alohida e’tibor qaratilgan. Raqs ustalarining chiqishlari ichida eng e’tiborga moligi esa “Baxt uchun” qo‘shig‘iga ishlangan yigit va qizning raqsi bo‘ldi, desak mubolag‘a bo‘lmas.
Konsert dasturida “Dizayn” kulgu jamoasi yigitlari mehmon sifatida chiqish qildi. Jamoaning avvalgi konsert dasturlarida ham ko‘rsatilgan ba’zi sahna ko‘rinishlari hisobga olinmasa, ular zalga yig‘ilgan tomoshabinlarga xushkayfiyat ulasha oldi.
“Dizayn” a’zolaridan birining: “Bahrom Nazarov jonli ijroda kuylay oladimi?”, degan savoliga xonanda o‘z ustozi Ozodbek Nazarbekovning “Majnuntolning novdalari” nomli qo‘shig‘ini jonli kuylab berdi. Kutilmagan bu improvizatsiyani muxlislar davomli va gulduros qarsaklar bilan olqishladi.
Dasturda mumtoz adabiyot durdonalari — g‘azallar asosida tayyorlangan ko‘plab qo‘shiqlar ham kuylandi. Xususan, konsertning ikkinchi bo‘limi Alisher Navoiyning “Yo Rab” nomli g‘azaliga yozilgan qo‘shiq bilan boshlandi.
Bundan tashqari, konsertda Ogahiy, Mahtumquli, Uvaysiy, Feruz kabi mumtoz adabiyot namoyondalarining she’rlari asosida tayyorlangan qo‘shiqlar ham kuylandi. Zamondosh shoirlardan esa Ja’far Muhammad, Xushnud Darvesh singari ijodkorlarning she’rlaridan foydalanilgan.
“Ikkinchi bo‘limda kuylangan ‘Yetimlar’ qo‘shig‘i uzoq vaqt muxlislarning yodidan chiqmasligi aniq. Tarona ota-onasidan erta ayrilgan, iztirob-u hasratda qolgan o‘g‘il tilidan, qalblarni larzaga keltirar darajada kuylandi. Xonanda ham volidasidan juda erta ayrilib qolgani ko‘pchilikka sir emas. ‘Yetimlar’ qo‘shig‘i ikkinchi bo‘limning cho‘qqisi bo‘ldi”, — deb alohida ta’kidlaydi Feruz Muhammad.
“Baxt uchun” deb nomlangan tarona bilan boshlangan so‘nggi bo‘lim xit-qo‘shiqlar ketma-ketligi bilan barchaga ko‘tarinki kayfiyat baxsh etdi. Dastlab xonandaning yangi ijod mahsullaridan bo‘lmish “Sen kulganda”, “Kamtar bo‘l”, “Mastona”, “Qizga boq” taronalari ushbu bo‘limga fayz bergan bo‘lsa, yakunda xonandaning eng xit va raqsbop taronalari — “Lola-lola”, “Qaramading” va “Pari-pari” kuylandi.
Bir nafasda va a’lo darajada o‘tgan konsert dasturining birinchi kuniga “Pari-pari” qo‘shig‘i chiroyli yakun bo‘ldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)