Жанубий Кореяда одамлар ўз дафн маросимини репетиция қилиб олиши мумкин бўлган тенденция шаклланмоқда. Бу амалиёт ҳақида, The New York Times’га асосланиб, TJournal ҳикоя қилади.
Бундай хизматни, масалан, Сеулдаги Hyowon Healing маркази кўрсатади, унга дафн маросимларини ташкил этиш бўйича компания моддий ёрдам кўрсатади. Дастур бепул бўлиб, 2012 йилдан бери биргина Hyowon Healing’нинг хизматидан 15 мингга яқин одам фойдаланган.
Уларнинг баъзилари бедаво дардга йўлиққан бўлиб, шу йўл билан ўлимга тайёрланишни истаган, бошқалари эса ўз жонига қасд қилишга мойиллик ҳис қилиб, тўғри йўлга қайтишга уринган. Яна бир гуруҳ одамлар эса ўз ишхонасидаги иштиёқ уйғотувчи лойиҳалар доирасида қатнашган.
Дастур доирасида иштирокчилар анъанавий хризантемалар билан безатилган залда маъруза тинглаб, ўргатувчи видеони томоша қилади. Шундан сўнг улар васиятнома ёзиб, тобутга ётади.
Марказнинг қора либос кийиб олган ва «нариги дунё элчиси» ролини ўйнайдиган ходими тобут қопқоғини ёпади. Тадбир қатнашчилари усти ёпиқ ва тўла қоронғу тобут ичида 10 дақиқа ётади.
Ноодатий тажрибани бошдан кечирганларнинг аксарияти ўзини янгилангандек ҳис қилганини маълум қилган. Дастурдаги иштирокига қадар хаёлига ўзини ўлдириш ҳақида фикр келаверган бир қиз тобут ичидаги 10 дақиқадан сўнг юраги ураётгани ва ўзини тирик ҳис қилаётганини блогига ёзган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)