Жанубий Ҳиндистонда юзлаб йўловчи кетаётган йўловчи поезди темирйўл маъмуриятининг маҳаллий деҳқондан қарзи борлиги сабаб, суд қарорига мувофиқ, мусодара қилинди. Бу ҳақда «ТАСС» хабар бермоқда.
Times of India газетаси хабарига кўра, маҳаллий темирйўл маъмурияти қарздорликни тўлаб бериш билан боғлиқ масалани ҳал қилгунича, поезд қарийб икки соат давомида мусодара қилинган, деб ҳисобланган ва станцияда тўхтаб турган.
Карнатака штатида «Дҳарвад — Бангалор» йўналиши бўйлаб ҳаракатланаётган поезд Харихар станциясида полициячилар ҳамроҳлигидаги суд ижрочилари томонидан қўлга олинган.
Поезд бригадасига кўп йиллик қарз (тахминан 57 минг доллар) ҳали ҳам тўланмагани сабаб, ҳаракатланувчи таркиб тўлиғича мусодара этилиши маълум қилинган.
Маълум бўлишича, мазкур департамент Харихардан Коттуруга темирйўл бўлагини қуриш мақсадида 1991 йили 300 га яқин маҳаллий фермердан ер олган, бироқ ҳамма ҳам ери учун пул ололмаган — 100 га яқин деҳқон компенсация пулисиз қолган.
Ҳолат юзасидан билдирилган кўплаб шикоятлар натижа бермаган, бироқ Шивакумар исмли деҳқон охиригача ҳаракат қилган ва кўп йиллар давомида турли даражадаги суд инстанцияларига мурожаатлар йўллаган.
Охири маҳаллий магистратнинг бош судьяси қарздорлик учун темирйўлнинг мулкини мусодара қилиш ҳақида қарор чиқарган.
Ҳайратда қолган йўловчиларга поезд йўлда давом этмаслиги, йўловчилар ўз манзилига ўзи етиб олиши лозимлиги айтилган. Орадан икки соат ўтиб маҳаллий темирйўл бошлиғи департаментда ҳозирча бунча пул йўқлигини маълум қилиб, қарздорлик бир ҳафта ичида ёпилишига ваъда берган ва ўз ваъдасини кафолат хати билан тасдиқлаган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)