Ливия шарқий ҳукуматига содиқ бўлган, генерал Халифа Ҳафтар қўмондонлигидаги қўшинлар 18 сентябрь, якшанба куни уларни аввалроқ тўхтатиб қолган ва бир ҳафта илгари чиқариб юборилган қуролли гуруҳлар армияси ҳужумини даф қилди, деб ёзади «ТАСС» Ливия қуролли кучлари 302-бригадаси пресс-спикерига таяниб.
Унинг сўзларига кўра, жангларда беш жангари ўлдирилди, яна тўққиз нафари асирга олинди. Қурол-яроғлар ўрнатилган бир нечта техника қўлга олинди. Жангларда, шунингдек, бир ҳарбий хизматчи ҳалок бўлди ва уч киши яраланди.
18 сентябрь куни фельдмаршал Халифа Ҳафтар қўмондонлигидаги миллий армия бўлинмалари «нефть ярим ойи» (Сирт кўрфази қирғоқлари)даги асосий экспорт портлари — Рас-Лануф, Ас-Сидр, Брега ва Зувейтинани ўз назорати остига олди ва кейинроқ терминаллар мамлакатнинг ягона Миллий нефть корпорацияси ихтиёрига ўтказилганини маълум қилди. Ҳукумат кучлари Ас-Сидрадан 25 км ғарбдаги стратегик жиҳатдан аҳамиятли бўлган Бен-Жавад шаҳрини тўлиқ эгаллаб олди.
Маълумот учун, мамлакатда тузилган ҳукумат, парламент ва армия ўртасидаги келишмовчиликлар уларга бирлашиб, террорчи гуруҳлар назорати остидаги ҳудудларни озод қилиш имкониятини бермаяпти. Расмий қўшинлар қўмондони Халифа Ҳафтар БМТ миссияси томонидан шакллантирилган ҳукумат билан келишмайди ва айни пайтда парламент билан ҳамкорликда иш олиб боради. Reuters’нинг билдиришича, Ҳафтар Ливиянинг янги диктатори бўлишга даъво қилмоқда.
Изоҳ (0)