49 килограммгача бўлган боксчилар ўртасидаги турнир чемпионлиги учун колумбиялик Мартинесга қарши рингга чиқадиган ўзбекистонлик Ҳасанбой Дўстматов жанг олдидан ўз фикрлари билан ўртоқлашди, деб хабар берди «Оламспорт».
Фото: МОҚ матбуот хизмати (Анвар Илясов сурати)
«Узоқ масофадан туриб бизни ғойибона қўллаб-қувватлаётган мухлисларимизга миннатдорчилик билдираман», — деб сўз бошлади Дўстматов. — «Ярим финал жанги қийин кечишини билардим. Дастлабки икки раундни ютганимни билгач, сўнгги раундда кучни финалга тежашга ҳаракат қилдим ва бироз бўшашдим».
Ҳасанбой Дўстматов бўлажак рақибининг ярим финал жангини бевосита аренанинг ўзидан кузатиб борганини тан олди: — «Мен кубалик боксчининг ғалабасини кутгандим. Колумбиялик спортчининг ютуғи мен учун кутилмаган бўлди», — деди Ҳасанбой.
«Финалдга кимнинг рақиб бўлиши аҳамиятли эмас, чунки у кучсиз спортчи бўлмайди. Яхши томони, колумбиялик боксчи менинг жанг услубимга мос экан. Шундан хурсандман. Чиройли ғалаба билан ҳамюартларимни хурсанд қилиш учун жанг қиламан», — деб таъкидлаган ўзбекистонлик чарм қўлқоп устаси.
Ҳасанбой Дўстматов бундан 16 йил аввал Олимпиада чемпионлигини қўлга киритган ўзбекистонлик Муҳаммадқодир Абдуллаевни ҳам эслаб ўтди: — «Ўша олтин медаль ҳозиргача ягона бўлиб келди. Мен ҳам Муҳаммадқодир ака каби чемпион бўлишни истайман. Ғалабам қолган боксчиларни руҳлантиришини хоҳлардим».
Ҳасанбой Дўстматовнинг колумбиялик Мартинесга қарши жанги 14 август куни Тошкент вақти билан 22:15 да старт олади.
