Xiaomi 8 дақиқа ичида 90 минг смартфон сотди

Xiaomi компанияси Ҳиндистонда янги Redmi 3S Prime смартфонини тақдим этди. Юқори техник тавсиф ва арзон баҳо уйғунлиги ускунага улкан шуҳрат келтирди — биринчи партия саноқли дақиқаларда сотилиб кетди. Бу ҳақда, BGR’га асосланиб, «Hi-Tech.Mail.ru» хабар бермоқда.

Redmi 3S’нинг 2 Гб оператив ва 16 Гб доимий хотирага эга асосий версияси нархи 6999 рупияни ташкил этди. Премиум вариант бўлган Redmi 3S Prime эса 3 Гб оператив ва 32 Гб доимий хотирага, шунингдек, бармоқ излари сканерига эга бўлиб, у 8999 рупия туради.

Икки смартфон ҳам Qualcomm Snapdragon 430 чипсети асосига қурилган бўлиб, 5 дюймли экранларга, 4100 мА/соат сиғимли аккумуляторга, 5 ва 13 Мп камераларга эга.

Redmi 3S Prime’нинг биринчи партияси 90 минг смартфонни ўз ичига олар эди. Партия саккиз дақиқа ичида бутунлай сотилиб бўлди. Шу тариқа, компания секундига ўртача 187,5 смартфон сотишга муваффақ бўлди.

Компаниядагилар бунақа муваффақиятни кутмаганини тан олди. Смартфонларнинг иккинчи партияси 17 август куни етказилади.