Дубай аэропортида ёниб кетган Boeing йўловчилари қандай омон қолди? (видео)

Муваффақиятсиз қўнишдан кейинги илк лаҳзаларни Emirates Airlines йўловчиларидан бири кадрга муҳрлади, деб ёзади «Вести».

Роликда одамлар биринчи бўлиб ўз ҳаётини эмас, буюмларини қутқариб қолишга киришганини кўриш мумкин. Кўпчилик ҳодисани камерага олмоқда. Бирдан салонга экипаж аъзоларидан бири отилиб кириб, ҳаммадан самолётни зудлик билан тарк этишни сўради. Шундан кейингина йўловчилар авариявий чиқиш эшикларига йўналди.

Йўловчилар ерга тушиб, самолётдан узоқ кетишга улгурмасиданоқ, портлаш овози эшитилиб, ҳавога самолёт қопламасининг бир бўлаги отилиб чиқди. Аланга янада кучайди. Буларнинг барчаси саноқли сониялар ичида содир бўлди. Нашр таъкидлашича, эвакуация сал кўпроқ вақтни олганида ёки йўловчилар юкларини қолдирмаганида, 300 кишининг барчаси ҳам қутқарилмаган бўларди.

Аммо жабрланганлар бўлди: салонни охирги бўлиб тарк этган ўн киши ис газидан заҳарланди, улар касалхонага етказилди.

Қутқарувчилар дунёдаги энг катта сиғимли, бунинг устига энг бақувват реактив двигателли самолётда чиққан ёнғинни ўчиришга бир соатдан кўпроқ вақт сарфлади, ўт ўчирувчилардан бири ҳалок бўлди.

Эслатиб ўтамиз, Ҳиндистонга учаётган Emirates компаниясига тегишли самолёт Дубай аэропортида муваффақиятсиз қўнишни амалга ошириб, ёниб кетган эди.