Dubay aeroportida yonib ketgan Boeing yo‘lovchilari qanday omon qoldi? (video)

Muvaffaqiyatsiz qo‘nishdan keyingi ilk lahzalarni Emirates Airlines yo‘lovchilaridan biri kadrga muhrladi, deb yozadi “Vesti”.

Rolikda odamlar birinchi bo‘lib o‘z hayotini emas, buyumlarini qutqarib qolishga kirishganini ko‘rish mumkin. Ko‘pchilik hodisani kameraga olmoqda. Birdan salonga ekipaj a’zolaridan biri otilib kirib, hammadan samolyotni zudlik bilan tark etishni so‘radi. Shundan keyingina yo‘lovchilar avariyaviy chiqish eshiklariga yo‘naldi.

Yo‘lovchilar yerga tushib, samolyotdan uzoq ketishga ulgurmasidanoq, portlash ovozi eshitilib, havoga samolyot qoplamasining bir bo‘lagi otilib chiqdi. Alanga yanada kuchaydi. Bularning barchasi sanoqli soniyalar ichida sodir bo‘ldi. Nashr ta’kidlashicha, evakuatsiya sal ko‘proq vaqtni olganida yoki yo‘lovchilar yuklarini qoldirmaganida, 300 kishining barchasi ham qutqarilmagan bo‘lardi.

Ammo jabrlanganlar bo‘ldi: salonni oxirgi bo‘lib tark etgan o‘n kishi is gazidan zaharlandi, ular kasalxonaga yetkazildi.

Qutqaruvchilar dunyodagi eng katta sig‘imli, buning ustiga eng baquvvat reaktiv dvigatelli samolyotda chiqqan yong‘inni o‘chirishga bir soatdan ko‘proq vaqt sarfladi, o‘t o‘chiruvchilardan biri halok bo‘ldi.

Eslatib o‘tamiz, Hindistonga uchayotgan Emirates kompaniyasiga tegishli samolyot Dubay aeroportida muvaffaqiyatsiz qo‘nishni amalga oshirib, yonib ketgan edi.