Антуан Гризманн «Олтин бутса» эгалигидан ташқари Евро—2016 нинг энг яхши футболчиси деб ҳам топилди

УЕФАнинг техник кузатув гуруҳи Франция терма жамоаси ҳужумчиси Антуан Гризманни 2016 йилги Европа Чемпионатининг энг яхши футболчиси деб топди.

25 ёшли ҳужумчи Евро—2016 да 6 та гол урди ва 2 та голли узатмани амалга оширди. Унинг тўпурарлиги Adidas’нинг «Олтин бутса» совринини қўлга киритишига замин яратди.

Гризманн Португалияга қарши финал беллашувида гол ура олмаган бўлсада, Франциянинг ҳал қилувчи ўйинга етиб келишида муҳим ўрин тутди. У нимчорак финалда Ирландия постига, ярим финалда эса Германия дарвозасига иккита гол уришга муваффақ бўлди. Исландияга қарши чорак финал учрашувини ҳам голсиз тарк этмади.

«Антуан Гризманн ҳар бир учрашувда рақибларига хавф туғдира олди. У кучли техникага эга бўлган, тўпни ўзида ушлаб тура оладиган ва ҳужумни муваффақиятли якунлаши мумкин бўлган жамоавий футболчи. Техник кузатув гуруҳи аъзолари Гризманнинг энг яхши экани борасида якдил фикр билдирди», — дея таъкидлади УЕФАнинг катта техник офицери Иоан Лупеску.

УЕФА томонидан Евро—2016 беллашувларини кузатиб бориш ва таҳлил қилиш учун тузилган техник кузатув гуруҳида Алекс Фергюсон, Ален Жиресс, Дэвид Мойес, Томас Шааф, Саво Милошевич, Миксу Паателайнен, Гарет Саутгейт, Петер Рудбек, Хинес Мелендес, Жан-Поль Бриггер, Жан-Франсуа Домерг ва Пеки Боннер каби мутахассислар фаолият олиб борди.